Ad nemḥemmal
I wudem n iceffir n yiṭij
Ittmiẓẓiden am tmes n wesγar
Ad nemḥemmal
I wudem n iferrawen yulwan
Iγunza Sidi Asemmiḍ

**********

Ad nemḥemmal ḥertadem
Mara dduxxun yesγaren
Mara d-yawed lawan
N temsirt di tesdawit
Mara ttefriwisen izuḍaḍ
Ad myuṭṭafen seg wammas
Mara d-teqqim tizzegzewt
Deg igenni γas ihewwel

******************
Ad nemḥemmal
I wudem n tlaba, feṣṣlent
Temqestin yessger qurrif
N Bab n wagu d umeccim
An nemḥemmal
Almend n tmuqqint n wazzu
Ara d-yessers Yennayer
γef imnaren n tzeγwin

******************

Ad nemḥemmal ccetwa
Mara yeg iḍerfan wakal
Mara tefru zzedwa
N yefrax yunagen
Mara d-yeqqers igenni
Ad yeṛbu deg wakal
Mazal d lawan n ujiḥbuḍ
Ur t-id-nettawi d izlan

*****

Ad nemḥemmal
I wudem n wusu nni azegzaw
γef tturarent tzizwa
Am tcilmumin tifessasin
Ad nemḥemmal
I wudem n yifsan n tayri
Igemmun mi ittiγzifen ifurkan
Isbuṛkuten tiẓegwa

*******

Ad nemḥemmal tafsut-a
Mara sderwicent texlulin
Mara sseḥḥmunt urar
S ccna n iwarẓigen
Mara yefsi wakal amgun
Tasarezt i wemzur,
Netta d tudert ad gen tayri

*******

Ad nemḥemmal
I wudem n lmuja tanilit
A aγ-yeddun di lebγi
γef uzagur tetetti
Ad nemḥemmal
I wudem n lmelḥ d wurti
Deg weftis* aḥercawi
γef i gganen igerfiwen



Ad nemḥemmal anebdu
Mara yinig lebher d imawlan
Mara yeddeqdeq yijdi
Am wesfel ad neglilez
Mara teẓẓenẓer tiṭ n igenni
Ad deg-neγ yettnezzih,
Ay tettibnin tament
Mara tneggi
Mara yemmir imeṭṭi
Itturug itegg aldun




*plage : le terme est attesté en kabyle : aftis/ iftisen

Nacira Abrous
2012