Mi bdiγ asfirec, isem-im di tutlayt-iw ulac it.
Fell-am ahetwir assa yekker
Lemdeγ-kem, ur cfiγ amek
Ẓẓgeγ-kem-id seg wayen walaγ nekk mezziyeγ
Seg wedγes n yemma d setti,
Di kra n terẓeg d-iddan deg uyefki.
Ur yelli wanda uriγ isem-im,
Ur cfiγ wi yi imlan abrid-im,
Assmi yennṣel rrebg deg wallaγ,
Nwiγ ahat d ayenni, ziγ d tisuraf i mazal
Ttganiγ ad afgen imeqyasen seg iḍarren n imeḥbas,
Ad isfeḍ unuγnu seg wudem n wemdan
Mazal
Nnan-ak yal wa tilelli-ines
Wa yeqqar tilelli n laẓ, wa yeqqar tilelli n wucci,
Wayed yenna tilelli di tmelsiwt.
Anta tilelli i γer ttawin wigi?
Tin n leqder? tin n tissas? tin itekksen laẓ i ugellil?
Tin d-ittakken azγal neγ asemmiḍ?
Urgaγ-kem
Macci d ucci macci d taduli macci d tazzla, macci d rregma.
Macci deg yimi n imussnawen, neγ iḥcayciyen
Neγ ixelwiyen d iqewwaden
Urgaγ-kem d aslufu i wallaγ, d adubbez n idudan
Ziγ kem d anamek
Ur nezmir ad nargu ayen ur nessin...
Tilelli !
J’aime · Commenter