A wann ittinin: Mani nekka? Is nsul ad d-nuγul?
Nniγ-ak: Nekka-tt-nn nella, hat nella nsal ad nili!
Ddant tillas zrint Amaziγ, tuwi-d ad diγ yili,
Issker abadir g temẓin udu tent-ittetta uγyul!
Nniγ-ak akkwen adrar nezdeγ dig-s dac a luḍa!
Ad as-nekkes iselliwen nessukef awd isennann.
A nerẓ ireẓẓan taf ad tessgem εetti Tuda
Tizizwa ad taweγ g uleğig tzayed g iγran.
Ad tarew tamamt issidir ar tessegma Ayt Yafelman!
Ad tağ taṭfi-nnes g ifadden d wulawen i yifsan.
Akal-ddeγ nna d-nufa a yiger ameqqran
Ad dig-ek nkerz irden imenza d mayed iγudan!
A nemger anli d imendi ur idd afar d isennann.
Meqqar ak-iẓil uleğig terẓagem ay alili!
Ira-kwen ugelzim qa k-ibbey issker dig-ek taduli.
Han azazer aqqurar hat afa ayed as-igan.
Zdem-t-id a yelli! Tra-t lkuccet naf lman!
Nniγ-ak ay Amaziγ, asey tazert zuzzer aneṭṭar!
Zizdeg imendi, asi-t ssufeγ-t ammas i unnar!
Dderf ssiweḍ-t-inn i teγzant kud isul ammas i udrar!
Isigniw-ddeγ ibexxan timitar n tegniw
Ad d ur iferreγ unẓar teẓaẓeḍ-t ad tiniḍ ibibiw
Unna mi tenniḍ gat afus a wi iγerm-inew
yini-yak ur k-sulaγ i mayed ittaγen winew
Dγi ay Amaziγ nker,tisineḍ mayed ak-nniγ!
Han ussan ur myaγen,meqqar d amm wass-lliγ
Ferdedda-d hat tulid tifawt-nnek mek triḍ
Issudda wakal,anef allen takezḍ mani nn-triḍ.


Yaru-tt TANUMI g Tiṭṭawin
ass n 30-09-2006/ 2956