Nnan-as ay tecbeḥ Zaazi

Nfan-d seg At Uqasi

Di lbabur Lustrali

Usan-d irkkel s-lebɣi

Ad ferḍen iguduyen Lparis

Tɣil kifkif medden akk, Zaazi

Di tmurt n Hugo d Voltaire

Acu kan ma d Bebussy

Ixled lḥeb d uwermi

Ay tḥemmel tilelli Zaazi

Tettargu tagmatt Zaazi

Di nnutil n Secretan

Nnan-as:  i icebḥanen a yelli

Macci i kemmini

Tbubb dderk Zaazi

Tbedd ur tris Zaazi

Tsuɣ tessenz akrembiḍ

Deg izenqan, atma-s aklan

Suɛfen-tt ar tɣuzi iberdan

Mi s-sawlen, Silyuna, Zazi

Tezra d aɛekki Zaazi

Tezmumeg tzemm aɣesmar

Teɛceq deg urumi ablundi Zaazi

Yis yebɣa ad ig isli

Imawlan ugin Zaazi

Xas neḥyaf nugi

Aya ur t-nebɣi i mimmi

Teqsed Marikan Zazi

Teɣwa-tt ladimukrasi Zazi

Limmer ur walat wallen-is

Ur tumin, dinna tebrek

D udem amcum n layas

Acu deg ugraw n Memphis Zaazi

Twala, Angella Davis, Zaazi

A weltma i s tenna

Ad nezdi ur nettagad

Uccanen yundin i useggad

Akken ad tezzeɛ tugdi Zaazi

Terfed afus ger i ɛguguten

Yesserɣayen iṭruliyen

Yettwakksen i yiberkanen

Deg umennuɣ-im a Zaazi

Ad d-temliled tayri

Tusa-d seg At Ziki Zazi

Di lbabur Lustrali

Nfan-d akk s-lebɣi nnsen

Ad ferden iguduyen n Paris

Nacira Abrous

Aix-en-Provence Meɣres 2012