Σeffeṭ

Σeffeṭ!
Σeffeṭ!
Akka i d-ak-yeqqar
Ugdud s ddemmar
Σeffeṭ!
Deg-k yeɛya
Aṭas aya
Σeffeṭ!
Ur k-yettwali
Yebɣa tilelli.

Malek HOUD

=================

Tarwast

Icucef iman-is s tumast
Am win i d-iɛelqen tamrart
Irfed-d taxellalt n ẓẓalamiṭ
Am win yesɛeddan aqerruy-is deg tmeddict
Yefka i yiman-is times
Am win i d-ideggren iman-is ɣer yilem
Tamettant-is deg lmenṭeq
Ma d win ireqqen cwiṭ cwiṭ
Iman-is ur iteffeɣ
Alamma tensa tmes iman-is.

Tarwast: similitude
Tumast: essence:

Igumma yewwan

Wwan, wwan
Yigumma n lemḥan
Rkan, rkan
Yigumma n zzman

La d-ɣellin yiwen yiwen
Seg tqucac n yisekla
Ɣer wakal anda nella
Akal-nni n tmurt ukren
Deg-neɣ ttsummun idammen
Srekben-aɣ aṭṭan n tawla
S yimeṭṭi nugar tala
Nutni ugaren ideɣren

Imawlan kwan
Tcerreg tasa
Imawlan zzan
Σuhden taḍsa

Acḥal n tudert i fkan
Akken ad igem useklu
Ttrajun-t ad d-yefk agummu
Ad ttun lemḥan i sɛeddan
Yefka-d agummu arẓagan
Yecbeḥ, yedɣel, yettzuxxu
Yezdi lqedd ur irexxu
Tirrugza d nnif nzan



Dayen, dayen
Agdud yeɛya
Aṭas igen
Yuki-d tura

Yekker-d ad iɛiwed alqam
I useklu awessur yeɣlin
Ara yuɣalen d tirgin
Yis-sent ad yizɣil uxxam
Agdud seg zik yessaram
Ad t-id-mmagrent treḍbanin
Ad yerwu tiẓidanin
Yeqleb asebter n uzmam.

Malek HOUD