A bbuh fell-awen a kunwi
Ttmeslayeγ-awen-in d tirni
Tugim a d-tfehmem d acu
A wi εeggḍen ahraḥu!

Ur yeεdil wass-a d yiḍelli
Neγ itran deg yigenni
I yetthuzu kan waḍu
A wi εeggḍen ahraḥu!

Acḥal aya i tebdam tikli
Aggaḍ ur neẓri melmi
Yal wa abrid deg iteddu
A wi εeggḍen ahraḥu!

Nekni tnehrem-aγ am wulli
Nteddu-yawen di lebγi
Ma d kunwi tufam-tt d zhu
A wi εeggḍen ahraḥu!

Win tesbeddem deg-neγ yewwi
Rbaḥ yettaweḍ-iken-in s imi
Ma nqerben a γ-d-tinim lḥu
A wi εeggḍen ahraḥu!

Mi neεreḍ ad nbedd ad neγli
Tennam yiwen ur yettali
Kunwi testufam-d i beṭṭu
A wi εeggḍen ahraḥu!

Nessureg acḥal d imeṭṭi
Almi yeqqur yeẓri
Tram a γ-tḥermem deg usefru
A wi εeggḍen ahraḥu!

Briγ i temεict am tagi
Yif-itt win ur tt-neẓri
Am yiṭij iγum wagu
A wi εeggḍen ahraḥu!

Tennam kečč d aẓawali
Amkan-ik ulac-it dagi
Uγal ar Tizi Wezzu
A wi εeggḍen ahraḥu!

Syen uγaleγ-d ar Tizi
Ufiγ-d teğğa-yi temẓi
Griγ-d weḥd-i am bururu
A wi εeggḍen ahraḥu!

Wi kren a k-yini d nek i d nekki
Yal wa amek yettγenni
Uγalen d iwerğeğğiyen unebdu
A wi εeggḍen ahraḥu!

Ur ksiben kra n tmusni
Sluγen ula d tayri
Igenni sduxnen-t s rbu
A wi εeggḍen ahraḥu!

Tikli-nneγ s uleγwi
Nedderγel ur nettwali
Lhem yugi a γ-yebru
A wi εeggḍen ahraḥu!

Tcudd fell-aγ tugi ad tefsi
Ssaḥa di Rebbi
Ziγen newwi ddaεwessu
Ahraḥu! ahraḥu!

sγur Islam BESSACI

Tanemirt inek γef ussefru-k ifazen. Ssarameγ-ak afud igarzen.
Tanmirt
Sγur (Saεid amaziγ)

Tanemirt inek aṭas.Aken qaṛen:" win yebγan tamaziγt ad-yessin tira-s.
tasekurt yell-is tmurt