Tamacahutt agi, d tamacahutt n yiwen yilat neɣ ma teqqarem-as acacfal (géant), yettwa-snen di yal timura n umaḍal. Qqaren-d wid t-iwalan, m ad-yelḥu deg tlemmast n yill, iḍarren-is ttrusun af lqaɛa, maca aman ur d-ttawḍen ara ar tuyat-is. D angmar (chasseur) bu lhiba, yeẓwer deg ssyaḍa, ur yettagwad lewḥuc n teẓgi, s yedmaren ig ttqabal, ur yettuɣal timendeffirt.

"Amnir" i d ism-is, iluled deg unebdu, seg uglim n wezger ig nṭel ugellid baba-s deg uḥriq s ddaw wakal ur n ttak igumma, yeswa-t s idammen n yizem, ur t-id-rba tmeṭṭut, ur yessin tilqeq akked uzuzzen n tyemmatt, ur d-yekker s tmucuha zdat lkanun.

Ass-nni i deg yunag ar tmurt nniḍen, yezger izuɣar, idurar, akked lebḥur. Yewwi iberdan yennḍen, yeẓra-d tiẓegwa yessewḥacen, yelḥa ussan d wuḍan, armi yewweḍ ar yiwet tgelda ibeɛden. Yufa-d dinna tulawin maci d kra., maca ul-is ɣer tgeldunt ig mal. Mi yessuter afus n teqcict i baba-s, agellid yenna-yas deg awal-is : "Sliɣ la heddren medden, neṭqend ula d iɣersiwen, nnan-d kečč d angmar n yezmawen. Tessutreḍ-d yell-i f-ittnaɣen yergazen, attan d zwaǧ-ik maca wissen, ma tuklaleḍ mummu n wallen...". Ineṭqed wergaz yenna-d "ay agelliḍ amuqran, ak-id-yaweḍ ayen k-yehwan, creḍ ad-k-d-awiɣ ula d adefel yerɣan". Ixemmem ugellid yenna-yas : "Maci d adfel i ycuɣben, i yɣaḍen d wid yemmuten, yečča-ten waɣzen, ruḥ ma tzemreḍ ad-t-id-qabled s yidmaren, ad-k-heggiɣ tameɣra s iḍebbalen". Agellid yenna, argaz yesla, ur yewwi la učči, la aɛewdiw is-d-fkan, ala adebbuz ines, yerna yesbur agwlim n yizem, yedda.

Ur ɛeddan ara kraḍ (3) w ussan yuɣaled, ar ass-a, yiwen ur yeẓri amek yenɣa waɣzen, maca yewwid icciwen-is deg culliḍ-is yessersi-ten zdat ugellid. Agellid, ibeddel wudm-is, ur yurǧi ara ad yuɣal wergaz d ameddur, yenna-yas "ih, ih, yirbeḥ a mm-i", maɛna maci d tameɣra is-d-ihegga i uḍeggwal, d acangel am win ttheggin i yir acengu. Yersed yiḍ, yceggɛed ugellid sstut m lebtut ar wexxam anda yeggan wergaz, s tmes tesserɣ-as allen-is almi yedderɣel, ṭṭfen-t di 20 yid-sen, refden-t, bwin-t, ḍeggren-t af yiri n yil, ǧǧan-t dinna akken ad-t-eččen w uccanen. I yewɛer lexdeɛ, deg ul n wergaz iḥerreq, yekker, yeggul ad yerr ttar, yekcem ar yil, allen-is smarayent idammen. Yebbwi abrid ger waman, yessared anezgum s temreɣ n yil, yesserɣ urfan s ḥammu n yiṭij, yteddu kan, wer yeẓri sani, mi yewweḍ ar yiwen weẓru, isenned, yerẓa-t ɛeggu, yewwi-t nadam.

M id-yuki si tnafa, yufa iman-is deg usu, zdat-s yḥulfa i tmeṭṭut, yemḥaḥed, yebɣa ad-yekker, tenna-yas : "tbaneḍ-d d amennay, neɣ d angmar, sgunfu wer ttagad". Tɛawez fell-as sa (7) wussan, d sa (7) wuḍan, yal ass tsefaḍ-as allen-is s tḥergiwin (potion magique), armi d ass-nni i deg d-yeldi allen-is. A tafat id-yeflalin fell-as, a tayri t-id-yeqsen, mi yeẓra tameṭṭut i t-id-ijemɛen. I yecbeḥ weglim-is, i zuggwaɣit tcenfirin-is, af tuyat yeɣli-d wemzur-is. Yeẓra-d tiziri deg zal, yeshetrif wer aṭan, teqsit-id tayri, deg ul-is ṭṭerḍqen iḥulfan, ifeggeḍ d leḥmala, yesmared asirem.

Tameṭṭut ula d nettat d tangmart, aneccab-is (flèche) d usdid, werǧin yezgel tanegmirt (proie). Teteddu d iɣersiwen, anda truḥ ad-dduklen, yides zgan wuccanen d izamaren, iqjan, iwtal, ifrax, tizerzert d izerzaren. S anda ma tedda, tedda tnguft-is (escorte), tcalin deg teẓgi, am wakken tcalin iselman s ddaw waman. Maɛna maci ala d iɣersiwen d wumi teddukkul, ɣur-s tiklatin, gar-asent llan sa (7) tyessetmatin, teddunt yides, qeddcent fell-as, xeddment leḥruz imi d tiwkilin. Yal ta tif weltma-s :

Tamezwarut ṣṣut-is d alegɣan, m ad-tecnu awaɣezniw yettuɣal d llufan,
tis-snat tessen i wẓawan, m ad-turar snitra ula d Rebbi yeggan,
tis-kraḍ tessen i cḍeḥ yettban, m ad-thuz tuyat deg uzal ttirriqen yitran,
ma d tayeḍ d tanaẓurt s ccan, s yiniten tesbeɣ ula d igenwan,
weltma-s tettbeddil timeqwa n waman, yes-ent txeddem iseɣwan (bijoux),
tikent-is tegnu tiksiwin mabla lkettan, tfeṣṣel tirkasin s lmerǧan,
taneggarut tif di ssifa kra yellan, yewwi daɛwessu kra itt-iwalan.

Imi tent-iwala wemcum, yettu tayri-s, yettu awal s-yefka i tin iḥemmel, mi s-yenna "nekk yidem i lebda". Yuɣal am umattar, yezga yeṭṭafar tiwkilin, anda ruḥent yedda, anda yedda rewlent. Am yiṭij awk d yitran, tturanren tuqqna tuffra.

Ayagi yak ur d-as-iruḥ ara i tuzyint, teẓra kra yellan. Turǧa ad-yeɣli yiḍ, mi gnen iɣersiwen d lewḥuc, tessawel i teklatin-is, tenna-yasent "fernemt acu tebɣamt, nekk ad-kunt-serrḥeɣ kunemti ruḥemt anda kunt-yehwa, maca ur d-ttuɣalemt ara ar tegzirt-a, sbeɛdemt anda kunt-yehwa, ad-kunt-tefkeɣ iɣersiwen i terramt, ad-tidiremt d tilelliyin, ulac acu ara kunt-ixaṣṣen". Tneṭq-ed tmenzut tennay-as "nukkenti dagi i nettidir, ula anda an-ruḥ". Tenna-yasent "ad-truḥemt neɣ ad-akunt-erreɣ d iɣersiwen, fernemt !". Tenna tlemmast deg-sent "ayɣer ara nruḥ, d tagi id tamurt nneɣ, seg mi d necfa af yemma-s n ddunit". Tenna-yasent "ihi ad-kunt-rreɣ d iɣersiwen !". Tenṭeq tmecṭuḥt tenna-d deg awal-is : "ihi rraɣ d itbiren akken ad-nesrifeg s anida nniḍen". Ihi terra-tent d itbiren, maca werǧin srafgent ar tmura nniḍen, qqiment dinna, ddawarent af uxxam n yillat, i bɣant d ttar ad-terrent.

Imi ig-faq wergaz tiwkilin qlun-t d itbiren, yuɣal yettɣimi kan ɣur-sent, ur yecliɛ deg amek i gant, yettmeḥsis ala i nuttenti, imi s-wwint allaɣ-is, ula d netta yefkayasent ul-is. Terfa tmeṭṭut, win tḥemmel yezga d yitbiren, ɣurrentett s inciwen. Lvaz yeǧǧa taninna af yitbiren, amqerqur yessams tasekkurt s ileddayen.

Teggul, ur tesseḥnet, iḍ agi ad-terɛed. Turǧa ad yers iḍ, mi gnent tetbirin af useklu (arbre), tessawel i wfalku, tenna-yas "Meḥqiten-t aken i meḥqent ul-iw, s yidammen nsent ara yeḥlu ufeddix-iw". Netta iberrez fell-asent am yizem, yeṭṭef-itent ger waccaren-is, ssawlent ula w ad-yerren, yessugḍ-itent yiwet yiwet, a Rebbi ur telliḍ d amsellek. Ygezm-itent, igezr-itent, ur d-yeqqim deg-sent ala rric, yeɣl-id am udfel yessa.

Teɣli-d tsusmi af teẓgi, ggugmen iɣersiwen, isekla qquren, kkawen waman deg saffen, qujjren wulawen... teqqim teqcict ar lqaɛa, tesḥissif, tismin id-tt-issawḍen ar wannect-a. Tjemɛed rric-nni af irebbi-s, tsuḍ fella-s s unezgum, yesrafeg rric ar yigenni, qqlunt tewkilin d itran. Tmuqel ɣer-sent, cebbḥent igenni s wucraraq-nsent. Maca tiẓgi ur tessin asurif...

Yesla-d wergaz i wannect-nni n usuɣu, yuzzel-d, yufa tameṭṭut di lqaɛa, rric ger ifassen-is. Ibedd di tlemmast n yiḍ, yettmuqul kan. Tefɣed tɣirḍemt s ddaw lqaɛa, id-tt-id-yuznen d agama, berikt am tirgin, tettirriq si ddɣel, tusad ad-tawi asfel, s-wayes ad-terr ttar n wid d-turew teẓgi. Mi id-teqqes tɣirḍemt tasemmamt argaz, ula d-as-d-yexedem wenẓar, yuzzel deg-s ssem, yečča agwlim-is s ddɣel, yeɣli af tikelt, tiɣri-ines tcerreg igenwan. Nnan-d wid yeddren di tallit-nni, ula d lqaɛa thuzz mi yebbenṭeḥ, asuɣu-ines yessakwid ula d wid yemmuten. Tuzzled ɣer-s tmerrayt-is, tessawel, tettru, tmejjed, ula wa d-yeslen. Uzzlen imeṭṭawen am wasif af tfekka n win tḥemmel, tmedl-as allen, s ttawil teddem-d tarwiḥt-is, twehhatt ar yigenni, "Atan wasfel n ugama awi-t". Am rric-nni, tuli terwiḥt n mmi-s ugelliḍ ar yigenwan, teqqul ula d nettat d itran, teṭṭafar itbiren n wuḍan, akka id-ḥkan wid yecfan.

yir.taqcict@imyura.net