Akken i uγeγ tannumi, tikkelt-a ad wen-in-azneγ sin n yisefra.Yiwen d tasuγelt n usefru n Tespenyulit Angela Figuera Aymerich "Je ne veux pas", wayeḍ'' rriγ tajmilt i umedyaz ameqqran Muḥend Saεid Amlikec, yewwi-d awal fell-as Dda Lmulud n At Mεemmar deg wedlis-is: poèmes Kabyles anciens.
Ur bγiγ ara
Ur bγiγ ara
leḥmala s lexlaṣ
neγ timenziwt n yidammen
neγ tiγin s waḍu
neγ lekra n rruḥ.
Ur bγiγ ara
Ad rγen yirden u ad ixaṣ weγrum.
Ur bγiγ ara
deg yixxamen ad yili usemmiḍ,
deg yiberdan ad yili lxuf,
deg wallen ad yili ddemmaṛ.
Ur bγiγ ara
ad skerfen deg yimawen tikerkas
ad skerfen imelyan deg yisendaq ,
ad skerfen izeddganen deg yisekraf
Ur bγiγ ara
ad iḥebbek ufellaḥ mebla aman,
neγ ad yettÇummu wawlal war taγda,
ijeğğigen , ma ur ttilin ara deg luzinat,
tafrara deg lminat ma ur tt-nettwali ara,
neγ ma ur yettaḍsa ara uselmad n uγerbaz.
Ur bγiγ ara
ad qqiment tyemmatin war tifendwin,
ad qqiment teqcicin war tayri,
ad qqimen yibabaten war ddexxan,
diγ,igelliden n “Mages”,ad sen-d-awin
iselsa d yizmamen i warrac
Ur bγiγ ara
akal,ad t-bḍun d iḥricen,
ad neğren imenkaden deg yilellen,
ad tthuzzunt tekbabin deg yigenwan,
ad nxellel izamulen γef yiselsa.
Ur bγiγ ara
ad yemsudeγ mmi,
neγ ad msudγen warraw n tyemmatin
γef tuyat tamegḥelt d tmettant,
werğin timegḥal ad ssufγent lbarud,
werğin ad d-nxeddem timegḥal.
Ur bγiγ ara
wa neγ wihin ,ad d-yerr fell-i tili,
neγ ad iyi-ttseddiε unarag sdat n tewwurt,
neγ fell-i ad srusun inazalen d yiziwlen,
neγ s yisuḍaf ad tt-frun d acu i d tamedyazt.
Ur bγiγ ara
ad ḥemmleγ s tuffra,
ad ruγ s tuffra,
ad cnuγ s tuffra,
ur bγiγ ara
takmamt, ad tt-rren i yimi-w
mi ara d-iniγ UR BΓIΓ ARA.
Poème d’Angela Figuera Aymerich traduit en Kabyle(Tamazight) par Malek HOUD .
Amawal(léxique)
Anazal :l’affiche
Iziwel(iziwlen) :timbre(s)
Awlal:le marin
Taγda:l’orientation
Tifendiwin(tafenda):le parfum
Amenkad(imenkaden) :l’empire
Takbabt :le drapeau
Msudeγ :défiler.
Anarag :voisin
asaḍuf :la loi,le décret
Azamul(izamulen) :insigne(s),symbole(s)
Muḥend Saɛid Amlikec
Tamurt-a d taγewwaγt
Seg zik akka i tella
Γur-s acḥal d taddart
Deg (yi)durar neγ deg luḍa
Irgazen-is d at n tinzert
Ttkukrun-ten aṭas icenga
Tefka-d Saεid isefrawen
D Amlikec i s-ssawalen
Muḥend Saɛid Amlikec
N At Sidi Σli Uεebdella
Deg tebḥirt n wawal yenqec
Yemger acḥal di lγella
Tudert-is merra tberqec
Ṭṭrad d usefru sufella
Lḥeǧǧaǧ ,ideεεu-asen
Bxir s axxam ad d-uγalen
Inaw yenna deg Tewrirt
Yesdukkel agdud am yiwen
D argaz izemren i tsertit
Amennuγ-is d yirumyen
Ulac anda ur yewwit
Dagi neγ anda-nniḍen
Bubeγla mi d-as-yesla
S At Mlikec i d-yerra
Yeγra,yessen,yessefra
Gar tudrin yezga iferru
Isem-is akkin iεedda
Tudert-is tga d asaru
Awal-is mačči s tuffra
Yeqqar-it mebla akukru
D amjahed n yiwen n wawal
Anda yedda γur-s azal
ｫ Ageldun n yimedyazen ｻ
Akkagi i d isem-is wis sin
Agerdas d netta i t-yettakken
Win d-yennan si meyya akkin
Si Muḥend d win i t-yettqadaren
Yeεdel d Ccix Muḥend U Lḥusin
S wawal d lbarud yennuγ
Zeddiget neyya-s ur tluγ.
Deg tṣefṣaft ttγimin d agraw
Deg taddart n Iεeggacen
Snernayen akk awal azwaw
Imi d agraw n yimussnawen
Awal deg ugerjum d acraw
Yis-s kan i ttmesčawen
Ttnawalen awal s usefru
Tawant tewweḍ s aqerru.
Malek HOUD