Ass-a d amulli -inem a yemma., Kemm a tagellidt n tzizwa.
Yennayer deffir tewwura , d amulli-inem a yemma.
Xas ur teddiḍ ara i leḥfa, teddid i lehwa. Taferka d-nufa d azzu terrid-tt d ssraya. Yal tazemmurt di tferka n baba, tessen nnhati-m, tesswed-tt s imetti-m, yal adref yecfa i "tiεuppejt-im"
Mi yessa wegris n furar, acmumeḥ-im yessaγ tafat di lexla, yerra tili i wagu. Ad tawid azemmur ar yizid.
Kemm macci n At zik-nni, mezziyed xas tecfid i tilla, acu kan macci n Tura, Xas akken i tutlayt tgiḍ amḍiq, yal ass tefkid-as tazwayt. Lluleγ-d, ufiγ-tt id tuγ irebbi-m, tesmeγreḍ-tt id gar-aneγ. Mi nγil nessen taqbaylit, nemmed, ad tinid "a tarwa tinna macci d asfirec kan, macci kan d isefra neγ d izlan, ulamma wid-nni d agerruj d ǧǧan leqrun, macci menwala ilmed-iten. Tennid, aqbaylit d awal d tuttfa deg wawal, d nnif, d tilelli,..."
Assmi d nnulfant tikta, qqareγ-am macci akka. Tenniḍ rju a yelli, tudert macci ala assa : yal dqiqa s temsirt-is, yal ass s dderk-is. Ur tettfafad γef tiryalin wanag tiwiztin, tessegmayed tigemmi-m, tesswayed tineqlin ternid taktiwin.
Mi m-nniγ azaglu ala. Tenniḍ : " ur tbubbeγ akken ad t-bibbeḍ, xas bubbeγ aqecwal, ay deg-s d lγella"
Lweqt izri, "ala"nni mazal yecca allaγ, igellel deg-i, anamek-is yuγal d "ih" mi d-yeswa si tala n leεnaya-m.
Ay d-tewwi-d a timucuha n Yeqbayliyen neγ n Yirumiyen, assmi thekkud Hanseld Gretel, γileγ-ten d Imaziγen.
Ay turiḍ isefra-m deg uttafttar, dγa anda illa-t?
Ay tessawleḍ a timucuha, ay tettarud deg yisefra ayenni tura semman-as "si tmawayt ar tira " kemm imir ur teẓriḍ ara. Anda yella waya di tmaziγt nesselmasd assa?
Mi m-nniγ ẓriγ aya d uya, tiniḍ: acimi ur t- turiḍ ara?
Assa nekk da kemm dinna. Assa d amulli-m a YEMMA
Dagi neγ dinna tidmi-nneγ ur kem-tettaǧǧa.
Dinna neγ dagi azal-im ur iγelli.
Kem a YEMMA ileqqmen sser d lhiba.
Kemm a yemma tagelidt n tzizwa.
Nasira Abrus
1 Janvier 2013