Dihin…dagi !




Nezger, nerwel…
Yewt-aγ llqu, nettemεuqqu ad d-nerr
Win tt-izemḍen s ifassen-is, ad tt-yefsi s tuγmas-is !
Nlul-d ur newwiḍ ara, hcicit seg wassen i tebda
Nebbehba ur nufi ur nettaf

Dihin tesseffeḍ cwiṭ cwiṭ
Dagi nḍeggeε iman-nneγ tuγal-aγ d tanumi, a yimezwura a yineggura !
Nekki dagi i nγiγ yemma, uzaγ-tt, εelqeγ-tt !
Dacu-tt tyemmatt, ula d keččini !
Tasa-w ččiγ-tt d imensi
Ul-iw zenzeγ-t s rrxa
Ukreγ, nγiγ, γuṛṛeγ, xedεeγ !
Akka i bγan wiyyi, nekkni nedda-yasen di lebγi !
Dduqdumal dduqdumal ssers aqqerruy-ik am lmal !
A w' ur nelli am nekk cicc i neṭq-ed !
Dihin tettwaker tferka, bab-is yettwanγa !
Dagi wezzen-aγ furren-aγ, nεedda ar ssuq γef yiman-nneγ !
Γur-neγ taγawsa yiwen mačči yesεa-tt !
Γur-neγ tabarda iγyal ttemsteqsayen ansi i γ-d-tekka !
Dihin akal yettγuluf-d, lmelḥ tekker deg-s twekka !
Dagi am tzaγṛiwin i nga, nerna taḍsa
Win tt-izemḍen s ifassen-is yefsi-tt s tuγmas-is !
Dihin tenger ddunit acḥal-aya
Dagi wwin-aγ medden d imi, qqaren-as : atnan d wihida d wihida ‘‘egzotika’’

Aseggas n 20.., uddren-aγ-d yedlisen, ssekn-aγ-d di tilibizyuwat : ‘‘ wigi ttakken anzi ar yemdanen, llan zik deg wemṭiq flan, tura negren tzemrem ad ten-tezṛem kan deg muzyumen’’

Ğamal at Udiε