Iqqim-d d tama-w. D aberrani ula d netta di tmurt n medden, d abudali, neɣ akken i wen-yehwa semmit-as...Tiɣerdin-is, ay akka d tariḥt i d-ttakent, d tasemmamt, d tazefrant, texleḍ deg-s tidi akked waman n rriḥa i d-yerra, ḥqaḥqa!
Imdel allen-is acemma, am win yebɣan ad yerwel i ɛeggu i t-yurzen, maɛna ulamek, ur yezmir ara.. Udem-is yekkaw.
Iqqim akken kra n wakud, ildi-d allen-is yessaked akka n wakka, ijemeɛ-d kra yellan di lemnaxer-is, isusef ɣer tama taẓelmaḍt : " Tfuh!", yergem kra yellan d ṣellaḥ, kra yella d lawlaya, yebda yesgedruruz d yiman-is: "iserwet Rebbi ajaddar-iw, ula d tmaṣṣart-nni tugi-yi! Serwet kan, serwet, ɣur-k ad iyi-tzegleḍ!"
Imuqel daɣen yeffus ẓelmeḍ, iddem iwexxer tabalizt-is yeɣɣurṣen deg idis, isenned-itt ɣer lḥiḍ, iẓẓel sakin iḍarren-is iɣezfanen, uɛwijen, yecban ileẓwi yečča ṣdid seg wakken yemmar si ṭṭiɛfan. Igzem-it ɛeggu maɛna ulamek ara yesteɛfu..
Yemmameḍ akka acemma, yemmeɣ, s ufus-is teṭṭef tergagit, ɣer lǧib n tqemjett-is yehruran, iɣɣurṣen si tidi yeɣman fell-as, isufeɣ-d yiwet n tkemmust n leḥcic, isers tubbit ɣef lmeṣṣa, ibren-itt s lemḥadra d lqis, afus-is mazal itergigi, issaɣ-it, yejbet yiwet, dɣa yeffeɣ-d seg-s yiwen wabbu yesmundel-as allen, yettak-d tariḥt am tin n tfekka-ines tazefrant. Abbu yettali d asawen, yewweḍ ɣer sqef n lqahwa-nni i deg nella , ma d tiḥuna n wanzaren-is surugent abbu war aḥbas, sniffirent am useksut! Icɛel-d allen-is deg yiwet n tikkelt, d tizeggaɣin, neɣlent-d kra n tmiqwa, ma d axlul fiḥel ma neḥka! Yerna kra n tiremt, yemmeɣ daɣen ɣer lǧib-nni yesufeɣ-d yiwet n tculliḍt nniḍen; abrid-a d cemma, yeddem rrefda, yewwet-itt kan akken ɣer ddaw yiles-is yewwan am tqeṭṭiṭ n ukanaf! Imdel diɣ allen-is, yeqqel yeldi-tent din din, teṭṭef-it tusut tegla-d s waldayen yeččuren d cemma, kra dinna yenɣel ɣef yidmaren-is, isfaḍay-iten s lekmam-is..
Yemmeɣ diɣ ɣer lǧib-nni yekkes-d yiwet n texriṭ n weglim, yerkan seg yilefḍan, ad as-yini ḥed yuli-tt wadal seg wammus d ixixxan. Isekcem sin iḍudan deg-s, yeddem-d sin iṣurdiyen, iɛellaten ɣer ṭabla, isawel sakin i winna yesserbayen, yesneḥneḥ, yenna-as:
- Hemm! Hemm! Wa yaqcic, awi-aɣ-d snat leqhawi tiberkanin, tirẓaganin!
Argaz agerwaḥ yettmeslay s usuget, yerna yessuter snat leqhawi? Ala weḥd-s ɣer ṭabla!
Mi s-d-issers leqhawi-nni, yemmeɣ uqehwaji-nni yeddem iṣudiyen-nni yersen ɣef ṭabla, ma d aneɣrim-nni icax, isewweq leɛmer-is, israḥay agirru-nniḍen i d-yebren yakan. Aqehwaji-nni yesmameḍ icenfiren-is i wakken ad s-yini ma d ayenni kan i yeḥwaj, mi t-iwala yekcem di txelwit, yuẓam awal, yeǧǧa-t ger-as d yiman-is.. Ibedd dinna azal n dqiqa, yessikid igirru amek ila ireqq almi t-yesmundel wabbu d wamek i yemḥaḥed s-yin iruḥ..
Yemmeɣ diɣ uneɣrim-nni ɣer lǧib-is, afus yetterɛiɛic kter n tikkelt iɛeddan, yeddem-d kra akken n icelliq n lkaɣeḍ yeɣman, yumsen almi qrib ad yeqqers seg ilefḍan t-yulin, yeldi-t s lemḥadra, ad tt-iɣilleḍ ay amdan seg walbɛeḍ n talliyin-nni yezrin i it-id-yeddem, srid si tallit n Deqyus it-id-yessenser! Yeṭṭef-it sakin mezleg azal n tsaɛett, yettḥeṣṣin deg-s s yiẓri-s yemmundlen si dexxan. Iqelleb deg-s irennu, almi yeɛya, ittel-it, yerra-t ɣer lǧib, yezzi-d sakin ɣur-i yenna-yi-d: "Anida akka nella a yelli.......?
Djidji Nait