 | | |  |
 |  |  | |
|
|
|
UR YESSIN WUL AṬṬAN-IS … D tawengamt (d tiririt γef twengamt “Taklit n tayri”) sγur: “B.C Tanaṣlit” --I yiman n Fuziya Σeggad-- -Ur yessin wul aṭṭan-is, ur yeẓri anwa i d abrid-is! Ileḥḥu war lewhi, fell-as ẓẓayet tikli, deg webrid ur yessin ara. Ayen akk i d-ttmagarent wallen-is, ur t-iεeqqel ara, γas ma yella yuγ fell-as tannumi. Ur yelli ara d aderγal, maca, tuγal fell-as tallest n lebda. Ggten fell-as iγeblan acḥal, yeεreq-as wudem n lehna. Tiyersi i yezzin fell-as, mačči d tin i yezmer ad yefsi, yettnaγ yid-s yal ass, afud ur s-d-yegri… yettsuγu, ḥedd ur s-d-yerri, ḥedd ur yesli i teγri-s, imi deg wanu lqayen i yezder, tewwi-t tayugt n wussan, akin i lqaεa d lebḥer, akin i igenwan, akin i tlisa umaḍal i ssnen medden…. Nniγ-ak a gma n yiman; abrid ideg iteddu ur iban, taftilt i s-d-tessaγeḍ, texsi, mi d-iṣuḍ fell-as waḍu n tmeddit! Netta yettsuγu, kečč tedduriḍ di tsussmi, tettganiḍ amek ara tefru! Netta ireqq, kečč tettrajuḍ melmi ara d-yerr nnehta, tenniḍ ahat, d ussan ara yessexsin timess-nni i t-yessruγun… tenniḍ, tenniḍ… ur d-tenniḍ: S tidet yeεqel wul aṭṭan-is?! Tenniḍ: - Acimi ur tberruḍ i ṭṭbel deg waman, anef i wayen akken akk i t-yesduqqusen ad yeḍfer lğerrat n zzman, ahat ad yaf abrid iṣeḥḥan… - “Lemmer a d-yuγal zzman…” maca, teḥsiḍ tikli n zzman ur tessin abrid n tuγalin, ayen akken i γ-yettfaten, ayen akk i γ-yettağğan, yecba γer wussan, ma zrin, ulac tuγalin…Ayen akk i nfut, ayen i γ-ifuten, d awezγi a t-nemmager tikkelt-nniḍen, a tawaγit n win i teğğa targit, ger tilawt d uwezγi, yettnadi… -Acuγer ara targuḍ itran deg uzal? -Anwa i k-yennan ulac itran deg uzal ? -Ṭṭef ihi, deg ijifer n ccwal, qqim d tanekraft n wayen ur d-nettuγal… -Acuγer ; acuγer i γ-rran lebγi d lmuḥal ?! -D kemm i ifernen tirγi n wuzzal -uzzal s tmess ifessi -Ul tettarra-t d ulac tayri. -Tecceḍ tedmi-k, d nettat i d kullci! -Akken i tγileḍ, ihi? Wali, anwa akka i irebḥen seg yemrayen! Wali, d acu i sen-d-iṣaḥen, Rumyu d lmut, Qays d tisselbi, i kemmi? D acu i tγennmeḍ ass-agi?! -D aṭṭan. -D kemm i yefkan laman. -D targit i ssarameγ kan! -Argu ayen yellan, d acu i kem-yewwin γer yetran! -D iḥulfan. - Jerreb ihi, ssusem kan. - Acuγer i tesmenyafem tasussmi, acuγer i tekksem awal i yimi, ayen ara tesgugmem tayri? - Suγ, ma tesεiḍ tabγest, aha, ini-yasen i medden, amek i tewweḍ ddebra s iγes, anef i win yuklalen, d win ur nuklal γef twaγit-im ad iḍes…Aha, d acu i tettrajuḍ, ahat, beggen-d d acu akka i tettḥulfuḍ! -Ur yelli d ayen n dir, mačči d ayen megdulen… -D ayen ur kem-id-yettṣiḥen, d ayen i kem-ibeεden, atan d acu-t. -Ur ẓriγ ara d acu-k?! -D lemri, anda ara twaliḍ udem-im, wali, deg-s ma yehwaya-yam, izri akk d yimal-im… -Εni, d agezzan, wissen, ma tesεiḍ tabellart-nni n jjağğ, awi-d meqqar ad waliγ anda yella yetri-w, ad kkseγ agu-agi i iγummen ul-iw. -Tabellart i sεiγ d ussan-nni i ikerfen izri-w, d ayen akken i yesεedda yixef-iw, wali kan ahat, ad tafeḍ deg-sen iman-im. -Anef-iyi ur ttwaliγ, anwa i k-yennan γer tid akken i tesεeddaḍ ttcabiγ?! -Tecbiḍ akk ayen i iεeddan, γef yixef-iw ur ntettu, ssneγ abrid n iḥulfan, anda i yettfuku, ẓriγ amek i zerrin wussan, amek asemmud irennu, ma tegraḍ-d i yir aṭṭan, ḥṣiγ amek i yi-teḍra, ad am-teḍru. Ahat, nniγ-am-d yakan a "Taklit n tayri“ d iḥulfan, yak tayri d aγurru?! -Ala, ala… Tayri a gma n yiman d aḥulfu! -Aḥulfu d aγurru. -Aḥulfu a gma n yiman d ccbaḥa ur nettfuku. -Ccbaḥa d aγurru. -Ccbaḥa, a gma n yiman, iḥemmel-itt yillu. -Illu ur iḥemmel aγurru! -Ssusem kan, anef i wayen i yi-yesserγen ad yernu, fiḥel a k-γiḍeγ, dayen, d nekk i iḥemmlen tirγi-inu. -D tasussmi-iw, i kem-yezzuγren γer tizi n waṭṭan, ammer i m-d-mliγ si tazwara amek ur d-ttuγalen wussan, yili, ur tettfateḍ akk ayen yelhan, ur kem-kerrfen ass-a iḥulfan. -Ssusem! -Tasussmi, tneqq tiγri, tasussmi tesseftay awezγi. -Ḥemmleγ tasussmi. -Turez-ikem tugdi. -Ḥemmleγ tasussmi. -Teffreḍ deg ijifer n tugdi! -Ḥemmleγ tasussmi… -Tekref-ikem, tugdi, fiḥel ad tesdergeḍ fell-i ayen akken i ssneγ nekkini, fiḥel ad tnekreḍ ayen akken i yebγa wul-im a t-id-yini. Teẓriḍ tuεer tikli, teẓriḍ iman-im ur tessineḍ ara, tεuddeḍ yeshel kullci, tenwiḍ d tira i iṣeffḍen, tebγiḍ ad terreḍ lmedda* melba imbuxxen, tenwiḍ llant tecraḍ war idammen?!... -Nwiγ tazmert n tayri, tif tin n medden, εuddeγ awezγi, d tayri i t-iregglen. -Nniγ-am, meẓẓiyeḍ ur tessineḍ, nniγ-am, ssusem tesleḍ, meyyez ad teẓreḍ, ayen akk i ikefnen s wabbu n tmess-im, di rrεud n tegnawt-iw a s-tesleḍ. Sel amek i tneqq ccbaḥa amdan, amek i tettγurr targit iḥulfan, ẓer amek i d-yettuγal zzman! Aseḍsu, ad yeğğ imi-m, ad am-yuγal d imeṭṭi, asafu ad yeqqed ul-im, deg-s a m-d-yeğğ ccwami, agu ad iγumm allen-im, ur am-d-tettban tziri, d terẓeg i d lqut-im, a t-tεerrḍeḍ deffir nnhati. Acrureq ad yesfeḍ seg wallen-im, si εawaz ad tettensimmiḍ, leḥzen a d-iban γef wudem-im, zdat lemri ad tergagiḍ, ur tεeqqleḍ iman-im, d tayeḍ ara tiliḍ. Tawlawalt, a m-tuγal d aṭṭan, aṭṭan-im yal ass ad yettnerni, ad tessutureḍ liḥsan, seg wul aberrani, ad teccihwiḍ aman, di ccetwa fell-am ad yeqqar igenni, ad terjuḍ ger tizzyiwin-im, ḥedd ur kem-id-yettwali… Ussan, a d-ẓuγren ussan, ussan i yettruḥun fell-am ad tezzin, ur tettafeḍ laman, d layas ara m-d-yegrin… Ussan a d-rnun deffir wussan, ussan ara d-yasen a kem-awin… -Ttif lmut, tudert n war lebγi! -Ttif lmut s lebγi, tamettant s ccḥani, kemm tenwiḍ ddunit d tirga. -Tudert d leḥmala… -Tudert, d timucuha, yal wa amek tebda tedyent-is, keffunt s yiwet talγa, «D udem-is i d tabrat-is! » - D acu i d leqrar-is?! Mel-iyi ur ssineγ ara, amek ara yeεqel wul aṭṭan-is, akken a s-d-yaf ddwa? - Ur yessin wul aṭṭan-is, abrid ur t-iεeqqel ara, ammer t-yessin ad tqeεεed tikli-s, ur yeggar aḍar-is di temda … Ur treggi tegnawt-is, ur s-tettcuḥ lehwa, ur ttkawen iẓuran-is, ad ijuğğeg lebda…. -Amek ihi?! Ttxilk mel-iyi! -D kemm i yeẓran tura, nekk awal-iw dayen yeggugem, kemm deg-m tefti lhedra, nekk imi-w yeqqar kan “Ssusem”! -Ssusem, neγ ssiwel, qqim neγ rwel, d acu ara i iṣefḍen ccwami n wussan, d acu ara i iḥebsen tikli n zzman, amek ara neg taggara i iḥulfan?! -Ini-d kemm! -Meẓẓiyeγ… ur ssineγ! -ihi, ssusem! -Aql-in ggugmeγ… -Ur ttgugum ara, nniγ-am kan ssusem; di tsussmi tella ddwa, ma d agugem yettawi-d lada. -Ur gziγ ara! Ssefru-d imeslayen-ik! -Tegziḍ, γas ur tfaqeḍ ara, teẓriḍ ayen akk ur teẓriḍ ara, fiḥel tuffra, ssyenna akk i d-nekka, teẓriḍ ayen ẓriγ, tessneḍ ayen akk i m-d-nniγ, tugadeḍ kan a d-iban fell-am! Tedduriḍ ijifer n ṭṭlam. -Ugadeγ! -Tabγest-im d ulac! Lqeḍra-m d tilemt, iferr-im d amerzu, wamag aql-ikem-id tesrafgeḍ seg wacḥal-aya! -Anda?! -Ar umaḍal-nni i tessneḍ ur ssineγ ara! -Yili aql-in ddreγ tura. -Ihi, d acu tettrajuḍ akka? -Ttrajuγ a d-tres tmella, ttrajuγ ad mmagreγ lehna, ttrajuγ tifrat i temseεreqt-a. -Rju ihi taggara. Wehran: Γuct 2957/2007 Tamawt: * Lmedda, ttarrant-tt tulawin γef timmi-nsent akken ad cebbḥent yes-s, ssruγunt-tt di teccuyt-nni n ideqqi (qqaren-as taccuyt n lmedda) taḥcict taqurant i wumi qqaren Lεefṣ akk d Ṭṭib, d wiyaḍ, sikin a ten xelḍent di teccuyt-nni tamecṭuḥt i wumi ttarrant tadimt, srusunt-tt γef tergin alamma rγan leḥwal-nni, ttuγalen d imbuxxen ( busfus/ tanulya), nnda-nni n leffwar-nnsen di tadimt n teccuyt-nni i ixelḍen s yembuxxen i d-fkan leḥwal-nni mi rγan ttcebbiḥent yes-sen timmi-nsent. Asabter yellan deffir wa | Asabter n zdat
War isem
- Tinin-is...Azul,
si tama usmeγ akka cemma, acku yal ass nekk d wallaγ d anadi γef imeslayen yettaken anzi γer wigi, ulac...
Si tayeḍ, yennecṛaḥ wul yerna almi dayen, acuγer?
Kecmeγ-d ar wesmel, ufiγ-d ayen yettnadi wul ataṣ aya
( ayen yelhan, yettwarun s teqbaylit, imeslayen ideg yella
unamek ).
Simmal qqareγ, ijebbed uselkim deg allen-iw akken ijebbed dkir deg uzzal ( Winna a d-yini dagi: Uγaleγ am izimer yettwajebden si teqlaṭ).
Ihi fiḥel a d-zziγ amrar i wedrar, s tudert-im a weltma!
- Tinin-is...Imken d wagi - ayen akken ttarant tlawin ghef timi-nsent - i wumi qqaren γur-neγ ḥirqus.
Tanmirt γef weḍris-agi !
Tansa
- Tinin-is...Yewwet-iyi wugur snat tikkal, riγ a d-aruγ:
1)- acemma mačči cemma.
2)- Taseqlaṭ mačči taqlaṭ
Ḥman idammen i tikli, γas akka ifadden-nneγ εyan
- Tinin-is...nekk nniγ tagi akka iwumi tettnadi d acu-t waṭṭan n wul-is nekk ahat ẓriγ d acu-t mi ara s-iniγ "Ala" nettat ahat tefhem teẓra. ulac ticraḍ wa idim, win tebγiḍ ina-s srid ur teffer ara a Tanaṣlit, acuγer tesmuγbuneḍ akka nekk nniγ ahat yezha wul-im mi yi tferneḍ akken ad iliγ d axḍib-im? sqecmiεeγ kan γur-m ad terfuḍ γef uẓelmaḍ-agi i wumi yeεreq uyeffus-is! maca ayen akka tettaruḍ yexḍa tasekla yexḍa tira nekk nniγ d yiwet ger snat kan: 1- ahat tzerriḍ yes-neγ akud? 2- Ahat tettnadiḍ inexḍaben s tira-m. nekk ma tebγiḍ rray-iw ruḥ zwej axir-em (am).
- Tinin-is...Azul
“Zaylai zaylali
Zaylali azal qayli
Ma qqnent wallen dayenni” Zeddak Mulud.
Wissen ma d tidet dɣa si Wehran i d-turiḍ akka ? Wissen ma d aẓelmaḍ ( Amreksi- aṭrutski neɣ alinini ) n tidet, neɣ akken i t-yenna akken Ɛli Ideflawen:
“Ṣuṣyalism dimukrasi
Atewri, arejɛi
…….”
D asqecmeɛ kan wayagi i k-d-nniɣ. Tenniḍ “ Ayagi tettaru yexḍa tasekla, yexḍa tira” S tidet kan, tesswehmeḍ-iyi ay ameddakel, Aẓelmaḍ!! D acu i d “tasekla” ɣer ɣur-k keččini? D acu i d “tira” ɣer ɣur-k daɣen? Ur ḥṣiɣ, ur umineɣ d inexḍaben i tettnadi, imi ttasen-as-d, tettarra-ten ɣef tewwurt. Ma d tamsalt usezri n wakud ur tekcim ara aqerruy-iw, acimi? Asezri n wakud mačči s tira; wid d tid yessezrayen akud, ssezrayen-t s unezzeh d unecreḥ akk d umerreḥ, akka i ssneɣ nekkini. Nettat akken i tt-ttwaliɣ la tezznuzuy deg imeṭṭawen-is. Akken i t-yenna Lewnis At Mangellat:
“Cekren-t medden d afennan
Nnan amaseɛd n wul-is
A lukan dɣa d tidet
Yezznuzuy deg imeṭṭawen-is”
I yelha wul-ik, gedha yes-k! Ɛeddi kan a s-tini Teqbaylit i win tḥemmel: “ Ḥemmleɣ-k”!! Ahat ur tessineḍ akken yessefk timetti taqbaylit, neɣ tɣileḍ akk leqbayel ffɣen-d si “Basṭus” akk d tesdawit n “ Ɛeberreḥman Mira”!! Yessefk ad teḥṣuḍ llant telmeẓyin yemmezlen am wakraren, imi slan yes-sent imawlan-nsent ɣur-sent imeddukal, neɣ ɛad ḥemmlent kan!! D acu kan ma tselleḍ i Ḥesni, neɣ i Neṣru akk d Xaled, tzemreḍ a d-tiniḍ ugar, skud d Awehrani ay telliḍ! Lwiza Ḥanunu (yellan zik d “taṭrutskit”, yeqqlen tura d “talumbartist”) tezmer a d-tbedd d taselwayt n tegduda n tmurt n LANJIRI, ur tezmir ara ad tejweǧ war ma yefka-tt baba-s ( akka ay tt-yefra usaḍuf n twacult), ay Aẓelmaḍ, ay ameddakel ( acḥal cebḥen yismawen-agi: “ Ameddakel”, “Amɣid”… )!
“Fiḥel ma nezzi-d i wedrar aɛmam” I yenna Muḥya. Yelha ma nuɣal-d kan ɣer tɣeṭṭen-nneɣ. D acu ara terbeḥ tmeslayt akk d yedles-nneɣ, d acu ara ɣ-d-yeḍren ma tefra-tt kan d yiman-is, neɣ d wi tḥemmel?! I lemmer ur yettumerret ara, neɣ ur yettumeḥḥen ara Belɛid At ɛli, amek ara ɣ-d-yeǧǧ ungal amenzu yettwarun s tmaziɣt ( Tizmamin n Belɛid, aseggas 1952)?! I lemmer ur yettwaḥqer ara, neɣ ur yenɛettab ara Si Muḥend Wemḥend, amek ara ɣ-d-yeǧǧ acḥal d asefru?!
Nnan “ Yettak-d lhemm i wi s-izemren” . Maca, yettak-d daɣen irden i yir tuɣmas”!
Kečč d Aẓelmaḍ, nekk d ameẓẓallu, d awezɣi ad nemsefham! D lawan n tẓallit, ad kkreɣ kan ad qḍuɣ lewqat-iw, d acu tenniḍ a Yir nettat?
* Lewnis yenna : “Buddeɣ-am lhemm yestufan”, nekk buddeɣ-ak mmi-s n Wemsed.
Amɣar
- Tinin-is...azul a librubru, tagi iγef nettnaγ akka, tanaslit i yerran iman-is d jida-s n tayri d yiman d iḥulfan, tagi i iεudden iman-is d tamaziγt, dγa, kra din i yiman-is kan, tasekla-agi uγur d-tekcem akken a s-teḍlu ilefḍan, tuγal mačči d tasekla, tuγal d iẓẓan d ixixxan, d kra yellan, ad yenεel wass m akken i tessen ad teṭṭef amru yiwet am ta, kra tettaru γef wul-is kan, amzun tesεa une maladie cardiaque, dγa ma yella akka ad truḥ ^qer ṭṭbib n wul f iman-is....
- Tinin-is...Azul.
"Ul-iw yugi ad yamen belli tekfam
A ken-yettnadi yettaf-iken di lemnam"
Anida terram a War isem, a Yir nettat?!!!!
Hie!....hie!....hie!... (d imeṭṭawen mačči d taḍsa)
Tamawt : ad ak-n-stafeγ ay Aẓelmammaḍ!!
Mmi-s n Wemsed
- Tinin-is...Nfiγ akken yakk nfan, lamaεna ssebba yiwet.
YIR NETTAT i wumi ttmenniγ leḥsan, ur teẓri deg-i tewwet.
Nwiγ ad bedleγ amkan, am mmi-s n Wemsed qimm, sserwet!
- Tinin-is...riγ a d-aruγ: a mmi-s n wemsed, mačči am mmi-s.....
2)- Qim mačči qimm
- Tinin-is...I el axx Lεebd n Lerẓaq,
i lmunasaba n el iḥya ddikra tis-tlata uxemsin mi tendaleε ttawṛa
n rebεa uxemsin el mağida, yetceṛṛef lqunṣul el εam n Lanjiri di Lpari ( Faffa ), mass mmi-s n Wemsed yakk d ḥaram-ahu YIR NETTAT, i ddeεwa-k akken ad tḥedreḍ l lḥefla ar a yuqamen ass 01.11.2007 di Lqunṣuliyya lεamma n Lanjiri di Lapari m-leqwas.
W.i
Lxuğğa n tawacult Yirnettat-Amsed
- Tinin-is...Azul
Mmektaγ-d awal-nni n Lwennas:
Awal i d-tbedreḍ qerreḥ
Deg wul ijerreḥ.
Awal-ik qessiḥ nezzeh ay ameddakel! Wissen ma d tissas i yennernan deg-k, neγ akka ay d keččini?! Ayen d-tenniḍ tezriḍ yes-s i tilas akin, ur yelli d azγan, ur yelli d awellih,yecba rregmat ay ameddakel ! Amek ara yili wul-ik, lemmer ad teγreḍ awalen yecban wi “ ayen tettaruḍ d (…)?! S ttawil kan ay ameddakel, fiḥel ad nerẓ ifadden i yemdanen. D tidet, tigti deg wayen tura teqcict-agi yerza tayri, acku ilmeẓyen n tura d ayagi i ttnadin, ma ur t-id-ufin γur-neγ, ad qellben fell-as anda-nniḍen. Yernu mačči γas tayri iγef tura, tura daγen γef wayen-nniḍen: γef tsekla taqbaylit, yecban ayen iɣef ttarun wiyaḍ… ma tzemreḍ γas aru-d γer tiddukla Numidya akken a k-n-aznen kra imagraden i d-yeffγen deg weγmis Tafukt.
S war cceḥna, s war takesna d war tuḥsift ( mačči s “war ṭṭyar” I yenna gma-tneγ Ṭṭir areqman areqman i wumi ssawaḍeγ azul d ameqqran)
Ǧamal
- Tinin-is...Azul,
Ddeεwatu-ukuma meqbula, yuccerrifuna dalik, ay axi lxuğa n ccḍeḥ! Γas γiwel-d ay Amnay!
Anda-k a mmi-s n Wemsed?!
B.Ğ
- Tinin-is...Azul
“Qeḍran ma yezwar s imi, i tamment i wumi” I nnan imezwura. Tarceft tezri, anfet I yiḍan ad ssgelfen! Afud iǧehden a weltma-tneγ Tanaṣlit. Ssarameγ ur tettcuḥḥuḍ ara fell-aneγ s tira-inem tameεzuzt. Aql-aγ yid-m alamma yefna leεmer
Bu ccfaya ( mačči d bu rregma)
* Neḥnu fi lxidma ya sidiqi Lxuğa, tanemmirt ilmend n tinubga-k.
- Tinin-is...Azul, aḥeqq jeddi Amsed ar ferḥeγ d ayen kan s tuγalin-inek ab tanzarin n War isem; asmi ara d-tuγal tmeddakel-nni-nneγ ( ur riγ ara a d-iniγ "inu" kan weḥd-i) YIR NETTATUN imren ara yennekmal lferḥ-inu.
i kečč tura a Ssi Lxuča, ansi d-tekkiḍ si twacult-inu?! Maca, lemmer ur k-ḥṣiγ ara wi-k-ilan yili sselseγ-ak-n takustimt, a bu tqerruyt ( Mmm ay Amnay!).
Yir argaz si Karačči
- Tinin-is...I aẓelmaḍ
Ulac azul, ay Aẓelmammaḍ, ay alammaḍ, ay asemmaḍ n wul!
Tuklalaḍ tanemmirt ilmend n tira-inek kan, igerrzen s teqbaylit; wama ayen-nniḍen tuklaleḍ tiγimit deg waddaynin a bu imeẓẓuγen. Awal-nni-inek “ Iẓẓan” ilaq-as webduz(V.C) , mačči wesmel muqadaren am wa, ay aεeggun!!
Yernu teqqareḍ a tt-id xeḍbeγ!! Amek, amek?! Γurk ansi s-d-tettεawaḍ i wawal am wa!!!
“Taqcict-nneγ neḥwaǧ-itt
Nesεa wi ara tt-ixeḍben
Lḥara-nneγ nẓerreb-tt
Ulac wi ara tt-id-iqerrben” I yenna Ccix Lḥesnawi ( Ccix n tidet, mačči wagi I iesemman I yiman-is “ Lḥesnawi” ur yuklal! Nnan-as ( di tilivizyu): ansi-k? Nekk si “BNI WASIF” I sen-d-yerra γlulu n Lḥesnawi amecṭuḥ ( ur yessin ara a d-yini “ At Wasif”)
Lemmer d jjwaǧ I tt-ixuṣṣen yili bubbeγ-tt γef tuyat-iw, mačči d tiγin ara tt-aγeγ am tγawsa, ay Aẓelmammaḍ!! γef wacu triḍ ad aru ihi?! Win yuran γef tayri, d ihuh!! Win yuran γef tsertit, d agejdur!! Win yuran γef tmajirt, d aneddab!! Win yuran γef imessḍen, d lεib!! Win yuran γef ddin rrrebbbb n tẓallit, mačči d amegday!! Init-d γef wacu ara naru ihi?!!!!!!!!!
Aḥeqq jeddi Amsed akk d tedmarin tileqqaqin, yecban “afarmaj” (mmm akken i tent-bγiγ!!) n Yir nettat, ar d ak-skantiγ, ar d ak-ssweγ timerẓuga, ay Aẓelmammaḍ, alemmaḍ, a bu wul asemmaḍ!
Γas taqcict-agi d timcenneft, ccwi kan, nekk yid-s ssyihin, ssyihin kan ( ussan-nni yezrin ẓriγ-tt zdat unebdad n weṭruli, zegreγ γur-s akken a s-iniγ “azul”, mi wwḍeγ zdat-s εerqen-iyi imeslayen, nniγ-as “ tura i neẓẓull, tura i neẓẓull!! Wwteγ εeddaγ); maca werǧin ad fkeγ deg-s afus, acku d yelli-s n tama-nneγ, ar tura anagar nettat i nesεa d tamyarut. Weltma d weltma γas a yi-teffeẓ, ur iyi-tesseblaε ara.
Qqim deg waddaynin, zdat lmedwed ay Aẓelmammaḍ
Aḥeqq jeddi Amsed ar xuṣṣeγ ad mmeγleγ fell-am a Yir nettat (am tedmarin n lipunj, am tḥennikin n lesfenǧ)
Yir argaz si Dalhi tamaynut (Nyudalhi)
- Tinin-is...Azul fell-awen ay imyura, tasekmut tameggazt, ssarameγ-awen afud igerrzen, d wussan ijuǧǧgen, d waṭas, aṭas n ujuǧǧeg i yedles d tutlayt tamaziγt di yal amkan, di yal lawan.
Ad snemmareγ s tussda gma-tneγ War isem, γef tedmi-s i yi-yesnernan afud, dγa a k-iniγ ḥsu d akken ayagi ma yella yennulfa-d, yes-wen, imi, mačči d ayla-w, acku iman n tira i yi-izedγen, d kunwi i s-yefkan tudert, i t-id-yessufγen γer tafat. Yernu werεad d tanalmadt i lliγ deg uγerbaz n wid i yi-ifuten, wid-nni i yi-yezwaren γer waddad, d askucceḍ kan i d-skuccḍeɣ seg wansi akken i d-zedmen, werεad γezzif webrid.
Yiwen wawal kan ara s-iniγ i gma-tneγ Aẓelmaḍ: yal wa d ilelli a gma deg wayen i yettwali, ahat mačči d tasekla i ssneγ nekk i tessneḍ keččini, hrawet tmussni, yal ass yettnulfu-d umaynut, mel-aγ-d ayen ur nessin ara! Ahat mačči d tira, mačči d tamedyazt… maca akken i yenna umedyaz Ḥmed Leḥlu:
“Wigi d isefra
Mačči d timsirin
Neγ d lewṣayat
Yezmer ahat d tuffγa i leεqel
Maca, mačči d tuffγa i webrid!”
Tanemmirt a gma, γef tamawt-inek, ay akken tebγu tili.
Tanaṣlit seg Wehran
- Tinin-is...Azul fell-am a Tanaṣlit,
akken ran iberdan ad iγzifen, kemm tuγeḍ win yessufuγen.
Tawuri-m tbubb ccbaḥa yezdeγ yeswi unamek n tmeddurt, γas rfed aqerru-m war wahin neγ tahin, timendeffirt ulac!!!
Aql-aγ yid-m s wulawen zeddigen am waman ur nluγ s wammus-nni yakk d-yewwi waḍu n wayen ( tis...) yerran taεebbuṭ n tnamit yemmlen deg-neγ s yezwawen yettarran iman-nsen d uḥṛicen d axxam.
Tanemmirt s tussda a weltma,
War isem ( Lxuğğa n twacult-nni tababaḥt ).
- Tinin-is...
Azul fell-awen(t) akkem ma tellam(t),
Ferh'egh at'as s wed'ris-a n Tnas'lit. Ghrigh-t, yennecrah' wul, xas ma yella bu-qamum-nni n "uzelmad" tweh'el-as tmellalt (anda akken tez'ram), maca Tanas'lit tufa-yas abrid tneflit i tira d awal kan.
Atan wedlis-nni ines fughef i d-nmeslay aseggas yezrin (2006). Ger timiren d wass-a, terna tira-s di ccbah'a akk u tettak at'as anza ar Djamel Benauf di Tira-s.
Atan ihi yisegh i win yettun d antta-tt Tnas'lit tuh'rict
http://www.imyura.net/Timenza/tabid/57/articleType/ArticleView/articleId/180/Lemmer-a-dyual-zzman.aspx
g.t. A mmi-s n Wemsed,
tikkelt-a macc'i d nek a xali-s; lxudja d yiwen nnid'en! Ach'al aya ur d-grigh turdas gher da a yamcum! Amek tettilim kecc' akk d tcighitt-ik ?
- Tinin-is...
A mmi-s n Wemsed, acimi terriḍ aḍar γer deffir?
Asmel ideg cebḥen-t tira,
imi tḥemmlen medden ttasmeγ.
Zik s tayri deg-s nura,
ass-a ur zmireγ ad tmuqleγ.
Di lbaḍna tugu tuffra,
d YIR NETTAT i d-ttmektayeγ.
Ccah ayen iran yeḍra,
maca, annect-a ur tuklaleγ.
Awi-yas-d ayen tettnadi, ad uγal!
Wwiγ-as-d čina si Tuğğa
d yefzimen seg at Yanni.
Teddem Aγumi deg-i teğğa,
tegdel-iyi seg ass-nni.
Ul-iw yeqber si tmerğa,
γlin-d iγerdayen seg igenni.
Ay amejjay n Σin Nneɛğa,
ttxil-k beɛɛej-iyi isegni!
- Tinin-is...Mmi-s n Wemsed
- Tinin-is...Azul
Awer iliɣ d tameṭṭut ɣer waṭas n leqbayel, ɣas ma nezga nekkat deg waɛraben akk d yenselmen, neqqar fell-asen « mačči d imegdayen » ; maca, aḥeqq jeddi Amsed ar nugar-iten di tesnaraft, ar ifen-aɣ s waṭas di temsalt-agi izerfan n tlawin. Amgirred yellan gar-aneɣ d wa :
Deg wawal amzun akken d nekkni i d ibabaten n tugdut, n tlelli.. Ma d aɛraben akk d yenselmen ɣas ttagen aya s wawal, maca di tigawt d ayen-nniḍen..
Awer iliɣ daɣen d tameṭṭut ɣer Unuɣmun-nni iɣef neqqar d amegday, yessen tilelli! Walit amek yegdel ɣef tmeṭṭut-is tira deg wesmel, ɣas mačči d ayen diri i tteg, tḥemmel tira s teqbaylit, tettaru daya; maca, netta yezzeɣzeɣ, yenna-yas “ala”!
Jjmiɣ liman n yergazen at ṣṣwab, ar lemmer d nekk i d Yir nettat ar teǧǧeɣ “unpan”!! ar ad cerḍeɣ fell-as, u a t-ssextireɣ gar tira-inu deg wesmel neɣ inebran! Yernu a s-iniɣ ɣas kkes aɣbel, aql-i da.
Awal i riɣ a d-iniɣ i winna akken yesfuḥen taqemmuct-is, ur yessetḥa, ur yenneḥcam: Medden ttɛanaden wid iẓewren, ttɛanaden uḥdiqen akk d wid i ten-yugaren di tmussni, akken I t-yenna: Umedyaz
“ A wid yeddan d wi t-yifen
Akken ɣur-s ad iiɛaned
Wama widak nemsawa
Anwa ara irefden wayeḍ”
Kečč triḍ ad tɛandeɛ mmi-s n Wemsed ameslub! Nekk sɛiɣ takerḍa n imeslab, ur yettɛanaden ara madden. Rnu ɣer wannect-a, nekk d Yir nettat d imeddukal, nemyesnam gar-aneɣ aqeṣṣer d unecreḥ…. Ihi mačči yal aẓru d alqaf ay ameddakel
Mmi-s n Wemsed si Nnijer
- Tinin-is...A mmi-s n Wemsed,
deg-i i tesserseḍ agejdur-agi?
- Tinin-is...Azul,
ahat ur i yi-tegziḍ ara kan, mačči fell-ak a ddada War isem; ales taγuri i wayen uriγ!
Yir Argaz
- Tinin-is...Am arezg-iw ihi, imi mačči γur-i i d-terriḍ nnican.
Tella teṭṭef-iyi tergigit a ddin qessam, nniγ-as ma yuγal-iyi-d tura win ḥemmleγ d acengu, rfed kan tabalizt-ik a War isem!
Tewεer teqbaylit-ik ay ameddakel, tugareḍ J.W.von Goethe mar a yettaru s tutlayt-is tayemmat.
- Tinin-is...azul
D tagi i wumi qqaren akken " heddreγ γef nnger, netta yeqqar d acu d-yeğğa"!!
Aḥeqq jeddi Amsed d kra yellan ibedd ar tesswehmeḍ-iyi a bu tanzarin (War isem)!! D acu i k-yuγen akka, tetxettxeγ neγ tretεeḍ-tt-id s lbesbasi lxennasi! D acu d-tenniḍ, akken ara k-n-rreγ s yir tiririt?! Yernu d acu d-nniγ yexṣer deg tedmi-w?! Mmeslayeγ-d γef waddad i tettidir tmeṭṭut γur waṭas n leqbayel; tura ma teẓriḍ telliḍ s yiwen seg-s, γas ččeḥ γef yiman-ik, a bu tanzarin! Berka-k ur tt-id-ttaγ ara i medden, neγ atan a k-rreγ d ccγel-iw!!!! Neγ teẓriḍ nekk cbiγ ajeğğiḍ, ma εniγ-k-in a k-ččeγ idisan-ik!
Ahat tejjmem "Sidi Xlil" a ken-in-yenfeε s lbaraka-s; qrib ad nuγal γur-s. Atan yuγal-d Winna γer wesmel, εni ssusqent-id seg "D.Z"?! Mazal-as ssya γer taggara useggas-a, simmal kan ad uγaleγ d anemhal amatu (D.G" n wesmel, a t-sṭixxreγ!! Hhah!...Hhah!... Hhah!... Yir argaz yuεer mačči d la čič!!!!
- Tinin-is...A mmi-s n Wemsed,
uhu ( ala ) ur d-lehhu ara yid-i ttxil-k! Ma tekkreḍ-d γur-i, ad rwun deg-k medden tikeεkuεin yerna ḥala win ad s-yinin:
" D win rnan medden i yerniγ", nekk a mmi d amγar, d ameεlal γef yiman-iw, ma terniḍ tesdegdgeḍ sin yeγsan-agi d-yegran deg-i, ulac anwa a s-yinin, d lewqam wayen yuqem mmi-s n Wemsed ( γas tamettant d tamaṣṣaṛt, ugaden-t akk yemγaren).
-------------
YIR NETTAT-ik aql-i la refdeγ, srusuγ yakk d tawkilin, ahat ad yeffeγ usefru ad yesseknun aqerruy-is s asmel akken d-yesseknay umextaf ifurkan useklu.
ḍeyat rA,
mesi raW
- Tinin-is...A mmi-s n Wemsed,
atan ihi bran-iyi-d imerbaḥ-nni:
Asefru
Ul γer Lpari yessawal,
ul i wumi yessawal semmeḍ.
Ttxil-k a baba Newwal,
yak tura d tikli ad tawdeḍ!
Ma yella ul-ik d amellal,
am wedfel n wussan ideg d-teffγeḍ.
Amsed deg YIR NETTAT-IS yuklal,
εegneγ-aken akken a teẓreḍ.
. . . . .
Akud ad s-nwet abanğu,
ccna-nneγ s tirga n tunṭict.
Ssanuğ deg-s ad nağu,
ad nefser iniγman di teεrict.
Sin waguren ad tennaṛğu,
glu-yaγ-d kan s teqcict!
Numen yes-k ur d-nettḥuğu,
awi-yaγ-d allen n temcict!
. . . . .
D awal kan i d-yewwin wayeḍ,
ur numin s baba Newwal.
D iberdan i γ-tesεeṛqeḍ,
ur neẓri i wumi nessawal.
Ma yella triḍ ad aγ-tγerqeḍ,
ulawen ur ten-yezgil ccwal.
Ma teğğiḍ-aγ ur tuksaneḍ,
deg tidet yuṛğa wawal.
. . . . .
Ajadaṛmi-m ma yezzeγzeγ,
uγal am nekk d War isem!
Awal aql-i ad am-tefkeγ,
War isem n tidet ad yessusem.
Maca, ini-yaγ-d ḥemmleγ,
Aṭlas b uqerru n lhem!
Akken tayri-nwen i s-umneγ,
fell-as tayri ur d-it-reggem.
- Tinin-is...Ad s-newwet abanğu, mačči ad s-nwet ( xuṣṣeγ deg wallen ).
Ahat ula d aseγti-agi d YIR NETTA, asekkur a dda Ğamal!!!
- Tinin-is...Ahat daγen: Fell-as tayr ur d-iyi-treggem.
Asekkur a dda Ğamal!!!
- Tinin-is...
Riγ ad sekreγ lhul, akken tayri ad tekcem s anda tekkat.
Aziγ tameṭṭut d " WAR UL", mačči kan d " YIR NETTAT".
Ay asirem ur smuhbul, ṭmeε-ik d asfel nefkat!
Seg wakken deg-neγ teggul, aẓar n tmeṛğa tesserkat.
. . . . .
A mmi-s n Wemsed a gma, tameddurt tetteddu γer zdat.
Sfeḍ seg ul ccama, ssufeγ seg-s YIR NETTAT!
Ssufeγ-itt γas ulamma, tayri n tidet ur tettmettat!
Ur ceṭṭeḥ i " Zeεma, zeεma", sel-d i sidi-k Mengellat:
" A ddunit-iw tessefraḥeḍ-iyi s lekteb,
terriḍ-t d sselṭan n lehdur.
A dduni-iw ANUΓMUN deg-s yeḥğeb,
gar-aneγ tebniḍ ssur".
- Tinin-is...Azul, tgiḍ i s-fell-ak ay ameddakel, fiḥel asḥissef, maca, ulac afrux yufgen ur iris! Tanemmirt a War isem, a War isem tanemmirt.
Yir argaz
- Tinin-is...Asefru i Yir nettat kan
D akemmel i usefru-nni " la diniti truḥ, truḥ la diniti" (nγan-aγ iğadarmiyen, zlan-aγ yenselmen; rrwaḥ truḥ meqqar a tt-nerr i "Iperpuren"!)
A wi yeqqlen d "li kuc"
Ad yekcem yid-m γ "dduc"
A kem-iẓer amek telliḍ
Ma teğğiḍ-t din ad iγucc
Ma tewwiḍ-t a d-yesṭuṭuc
Ad yili anda teddiḍ
Lu grun pewwiṭ du syakl
- Tinin-is...Yekker-itt waẓ-akin ger imezdaγ n taddart-agi:
Wa yeffeγ-d seg wexxam n xwal-is, yettazal s axxamγ-nsen, yeqqar-asen i widak d-yettemlil deg webrid" Ad ruḥeγ ad rrigliγ lantin", wayeḍ yessawal si tiγilt γer tayeḍ, yeqqar-asen i lγaci yellan deg ugemmaḍ " Azzel-t, ssiwḍet-as isali i mmi-s n Wemsed, init-as tura ad εeddi, γiwel-t atan yeqqim di kafi ric!
Lγaci-nni rran-as awal, nnan-as " Yesla, yasla, yenna-yas dda Ğamal, γur-k ihi kečč ẓer War isem!
Aziγ kra yeḍṛan akk d YIR NETTAT i cedhen, γillen ad εeddi ass-nni di brtv, ulac....
- Tinin-is...Azul akk i wid i d-ittarun γer le sit-agi, mačči aṭas aya segmi i d-ttuwellheγ γer-s ; ferḥeγ yis-s, iεğeb-iyi, righ ad ttekkiγ, ad d-ttakeγ tamuγli-w ma ad iyi-tqeblem? tanemmirt-nwen, saḥḥa lεid-nwen !
bu ugernin,
- Tinin-is...D tidet *UR YESSIN WUL AṬṬAN-IS …* anect_a d ayen yellan deg zzman_agi id neggra ,tayri tceγb yal ilemzi yal tilemzit.Thussun i waktayen _nsen maci d ayen ad inin ,maca aqcic ma ihemmel taqqcict yezmar ad t-id yini d akken ihemmel_it maca taqcict ur tezmir ara dγa tettara γer wul_is am tagi id yuran asefru agi ahat tettarra γer wul_is , tessufeγd aktayen_is deq usefru.Tayri tuεer ,aseεdi d win id tyexxdan.Tanmirt γef wedris_agi i yelhan atas atas.
| |  |  |  | |
|