Tayri-m a Massa, tessekcem-iyi timura unuγnu
Nekk werjin nekcim timura unuγnu
Werjin zriγ, imeṭṭi d amdan
Amdan ur nessin anuγnu, d asmekti kan n wemdan
Tayri-m tessekcem-iyi timura unuγnu
Tayri-m tger-i -yi deg unuγnu
Acḥal d talliwin ttnadiγ, ttnadiγ tameṭṭut ara yi-isnuγnun
Tameṭṭut, umi ara ttruγ γef iγallen, am wefrux
Tameṭṭut ara yi-d ileqḍen am iceqfan n wecmux yerrẓen
Tayri-inem, a Massa, tesselmed-iyi yal yir tikli
Tesselmed-iyi ad sneqdeγ afenjal-iw mara yezgen yid
Ad nadiγ iḥeckulen γer iderwicen
Ad beddeγ γef tewwura i temzuṛin
Tesselmed-iyi ad saheγ deg iberdan am ubudali
Ad ttaṣraweγ udem-im deg ugeffur, di zaylellu n tafat
Ad gemreγ seg wallen-im ddunit n yitran
A Massa, ay uzu n tasa-w
Tayri-m a Massa, tessekcem-iyi timura unuγnu
Nekk, uqbel tayri-nneγ, werjin rziγ γer tmura-a
Werjin ẓriγ belli imeṭṭawen d wemdan yiwen-nnsen
Tayri-m tessekcem-iyi timura unuγnu
Amdan ur nessin anuγnu, d awehhi kan γer wemdan
Tayri-m tesselmed iyi tikli n weqrur
Jerdeγ unuγen n wudem-im di leḥyuḍ
A tameṭṭut, a tin yerwin amezruy-iw
Mmezleγ seg yiγef n uzar armi d wayeḍ
Tayri-nneγ tesselmed-iyi amek tetezzi ssaεa
Mara ḥemmleγ, tḥebbes ula d Tamurt tuzzya
Tesselmed iyi ayen werjin d-tewwi tedmi-w
Ihi, γriγ timucuha n warrac
Kecmeγ ssraya d ihedman
Dγa urgaγ uγeγ yelli-s n Ugellid
Taqcict m wallen zegzawen am waman n isaffen
M tcenfirin zun d ajeǧǧig n ṛṛemman
Yerna urgaγ ukreγ -tt-id am di tmucuha n Yemnayen
Urgaγ efkiγ-as izraren n uεeqquc d lmeṛjan
Tayri-m a Massa, terra-yi shetrifeγ
Tesselmed-iyi annect iγṣeb wakud
Tayri-m a Massa, terra-yi shetrifeγ
Tesselmed-iyi annect iγṣeb wakud
Acu kan :yelli-s n Ugellid ur d-tusi ara
Nacira Abrous.