Deg wezniq-nneγ
Asmuḥyet n tezlit "Dans ma rue" tecna Edith Piaf
Sγur Sεid At Mεemmer
Zedγeγ deg wezniq Iwaγzniwen
Baba ikeččem-d s axxam yeddenden
Akken ad nedder yerna mačči d yiwen
Tkess yemma tiγeṭṭen i medden
Nekk d tamuḍint, ttaṭṭafeγ ṭṭaq usawen
Ttwaliγ imsebriden teddun neγ bedden
Mi yefka wass ifadden ad iyi-kkawen
Ul iteqqel d win yettagaden
Deg wezniq-nneγ medden ttawin ttarran
Selleγ-asen sbecbucen deg iḍ
Mi d iyi-tewwi tnafa γer sennig yetran
Ttduqquseγ-d seg wesmermeγ d lγiḍ
Mi zrin uderdeḥ, tiqqar d wid d-yettarran
A d-tezzi tsusmi d-iγeṭṭlen γef wul asemmiḍ
Deg wezniq-nneγ tceṭṭeḥ tili s imezran
Abbaḥ d asemmiḍ, a tabγest deg-i tekfiḍ
Yiwen wass yenna-d baba, a yelli
Cemmer i iγallen a d-tessiseḍ aγrum
Ur d am-qqareγ inig neγ cali
Awi-t-id kan dagi deg wedrum
Ttwalin-kem tcebḥeḍ at cclaγem
Ttγama cwiṭ deg wefrag
Mi d-yewweḍ yiḍ awi-ten teffγem
Ḥrec kan a yelli ssedrag
Deg wezniq-nneγ llant tlawin yettnaḍaḥen
Selleγ-asent nehhtent deg iḍ
Mi d iyi-tewwi tnafa d wid yettmerriḥen
Ttduqquseγ-d mi ara d-tas yiwet tettεeggiḍ
Mi yezri uṣeffer, ansar n wexlul d mi ara ttneḥniḥen
A d-tezzi tsusmi d-iγeṭṭlen γef wul asemmiḍ
Deg wezniq-nneγ llant tlawin yettnaḍaḥen
Abbaḥ d asemmiḍ, a tabγest deg-i tekfiḍ
Acḥal d ssmanat tura
Zedγeγ berra duru ur d-tekcim
Tiyaḍ akk fell-asent tefra
Γur-i ula yiwen udem ur t-yettḥeccim
Qqleγ ssutureγ tin n Rebbi
Talqimt n weγrum, cwiṭ n ḥamu
Γas ḥedqeγ ur sεiγ tiselbi
Yal wa yes-i deg tugdi yettcummu
Deg wezniq-nneγ timeddiyin d nekk i yettmerriḥen
Sellen-iyi-d smermuγeγ deg iḍ
Igenni mi t-yewweḍ ucewwiq n waḍu s-yettserriḥen
Tafekka-w tgerres seg ugeffur d usemmiḍ
Dayen tura ur zmireγ, la ttrağuγ tamettant a d-tas
Ad iyi-terbu deg irebbi-s ad sseḥmuγ
Deg wezniq-nneγ llan ineglusen, yella uεessas
Ad iyi-ddmen i lebda seg yir targit-agi ttarguγ