Taki d tukkist tis snat i d-kseγ seg yiwen n wammud n tullizin imu qaren “Weird Tales“ ţefγent-ed d tasγunt di temrikt ugafa.
Tullizt-a tamecṭuḥt yura-ţ E. Hoffmann Price u isemma-yas “The Rajah's gift“.

*Asefk = gift (présent, cadeau)


Aṭas n temεayin d tmucuha yessewhamen i d-ţţawin medden af yiwen akken n ugellid (Rajah) n yiwet n temnaḍt isem-is Lakra-Kai, di tmurt Ihendiwen.
Ţmeḥkayen af tgelda-yis, af wamek i ireṣṣa taγdemt ger wat n wakal-is, γef isefka i sen-yeţmuddu i yemddukal-is ...atg. Maca ayen awk yessewhamen, dayen akken i s-yefka i Zaïd, aneγlaf ameqran i iqeddcen fell-as aṭas uya.
Agellid aki yella d argaz n wawal, γur-es iles dayen kan. D amcum akken qaren, s tḥerci-s, Xas akken Amseḥras Aglizi yekcem s tuggta ar tmurt n Lhend werğin rekḍen-d tamurt n Lakra-Kai. D anassaγ(diplomate) iẓewren, yessen-asen i yawk inasayen n yurṛufiyen, yeγra tussna talqayant d yedles n yawk timura. Yessen-asent akken ma llant ama d tamecṭuḥt ama d tameqqrant.
Deg wexxam-is, yeţţidir amzun di turṛuft i yella, yexḍa i ţnefxa n igelliden-nni n usammer. Yesserked iman-is akken iwata.
Yiwen n wass, isiwel-as i Zaïd akken ad meslayen.
- Agellid : A Zaïd, lemmer mačči s tebγest-ik d tfeḥli-k, aql-i nγan-iyi acḥal-aya icenga. Σerḍeγ-k-id tameddit-a i wakken ak-rreγ tajmilt af wayen awk i txeḍmeḍ . Ini-y-id ayen awk tebγiḍ ak-t-in-serseγ ger ifassen tura.

-Zaïd :A yagellid ! γur-i kan yiwet n lḥağa ak-ţ-in-sutreγ maca ayen riγ dayen ur ikeččmen deg wallaγ.

-Agellid : Ini-d kan, meslay, ini-y-id awk ayen tebγiḍ, ţţu belli d agellid-ik i lliγ, ekkes akukru, meslay yid-i amzun akk d umeddakel-ik i telliḍ

-Zaïd : Azal n 10 iseggasen-a mi qedceγ γur-k, ulac dacu awk i y-ixuṣṣen, mraw(10) n iseggasen mḥababeγ akk d igelliden...maca aya awk d ulac zdat n wayen bγiγ.

Niqal yeţmeslay, cwi kan akka Zaïd ibeddel wudem-is, ikecm-it-id uxemmem, allaγ-is isewweq akin, ula d taγect-is tebehba...
Akken cwiyya yuγal-it-id wawal, yebda yeţmeslay s ţawil s ţawil, yebda iḥekku-yas-d i ugellid cfayat fuγef zrint snat-tmerwin(20) iseggasen.
Deg wakud-nni(20 iseggasen ar deffir) Zaïd tuγ γur-s 12 iseggasen, timiren tuγ-it d amlaẓ, d amerku, iteddu ḥafi deg iberdan. Yella ass-nni yeţrağu, akk d wat-tmurt, melmi ad d-εeddin imensan anda ad yawin ugellid nsen alma d tawwurt n ufakan(temple) ameqqran n Kali.
Agellid yedda-d af uzagur n yilu (éléphant), sya u sya medden kkaten afus, siγriten, wiyaḍ baten kan deg wurraγ-nni awk i yeqqen ugellid...
Zaïd ass-nni yeqqim yeţwali kan deg ugellid, allen-is ṭṭafarent kan ilu fuγef i d-yedda ugellid, yetwihem deg-s Zaïd, yeţwali deg-s amzun d illu s timmad-is. Zaïd yeggugem deg wayen i iwala assen, ula d tisusaf qurent deg imi-s seg mi yeqqim ddaw yiṭṭij azal qayli maca ur d-iḥar deg wezγal , di laẓ neγ tudert deg-i yenḥaf. Yeţmuqqul kan ar ugellid. Simmal yeţţaẓ-ed yilu ar tama anda i yella simmal ţbeddan-as ula ileddyen i Zaïd.
Zaïd timiren dayen, yeffeγ seg-s wallaγ, iḥulfa amzun d aḍu n tiselbi i d-yewten af yedmaren-is. Ass-nni i yeggul ula d neţţa ad yeddu deg imensan, ad yerkeb af uzagur n yillu akka am ugellid. Yeggul ad iger akken iga ugellid n Lakra-Kai.
Axemmem-a i xemmem Zaïd werğin yeffeγ-as allaγ, seg wassen ur yeṭṭaxer seg uqerru-yis. Ul-is yekkat yal m’ ar ay-wali imensan n igelliden.

Daya i s-yenna Zaïd i ugellid deg wawal-is.

-Agellid : Dayen yessewhamen tqessiḍt aki nnek, aṭas ansi d-kkiḍ ziγen akka ! Maca, ini-yid dacu i tebγiḍ.

Zaïd yelezlez-d wudem-is, yent’u-d amzun win it-id-yessakin si tnafa, yeḍsa-ţ-id yenna-yas i ugellid :

-Sel i wayen ak-d-iniγ, ayen i yerḥan ugar n 20 iseggasen-aya, timiren amek ik-yehwa tεayreḍ-iyi. 20 iseggasen, werğin yeffeγ seg walaγ-iw uxemmem-a. Aṭas i ẓriγ di tudert-iw, aṭas i d-lemdeγ maca...ayen aka fuγef terγa tasa-w werğin iwexxer seg wallaγ-iw. Kecmeγ-d d aqeddac ar γur-k almi siwḍeγ d aneγlaf-ik, qedceγ fell-ak akken iwata almi d ass-a, u aql-ak triḍ ay-terreḍ tajmilt.
Ayen i yerḥan 20 iseggasen-aya d imensan-nni i walaγ ass-nni. Ass-a, d aya kan i yellan γur-i ak-t-in sutreγ. Efk-as-d i wul-iw ayen fuγef yerγa 20 iseggasen-aya. Riγ ad d-dduγ deg imensan am ugellid, am assen mi k-in-walaγ trekbeḍ-d af yilu. Siweḍ-iyi ar lebγi-w, ekkes fell-i cayaḍ aki i yekkren deg wul-iw...

Agellid iga nnehta, yezzi ar Zaïd amzun d ababat yeţmeslayen i mmi-s, yenna-yas :

- Tmexleḍ waqil a Zaïd ! Ma yella ğğiγ-k ar lebγi-yaki nnek, d tameţţant-ik ar’ ad yawḍen. Lemmer ad dduḍ deg imensan am ass-a deg uzal, azekkayen ur k-d-yeţţaf ara d amuddir. Ak-nγen s ḥellejγar neγ s tmugḥelt ; acku ulac mmi-s n tmeṭṭut ur nγin ara ma yella yedda-d deg imensan am wi. Win ar ad d-yeddun deg imensan s-ufella n yilu, medden as-inin d winna ad iwerten agellid. I neţţa wiγer ad ggri tukkest(héritage). Aṭas i yeţţiktilen i wakken a sen-d-teggri tgelda i nutni. Aṭas ger wayyawen d ilewsan-iw bγan ad uγalen deg wemkan-iw m’ ara mteγ.
Amek ! Aql-ak tzedγeḍ di tmurt acḥal iseggasen aya mazal ur teẓriḍ amihi n wayen akka d-qqareḍ ?
Xemmem ! Mmi nγant, gg°ran-d krad(3) ilewsan-iw ţnaγen ger-asen anwa ay-iwerten. Yiwen seg-sen iḥewwes amek ay-ineγ, iga-yi taxazzabit akken ay-ikkes maca ukiγ-as af zik. Ulac dacu i s-nniγ, giγ am akken d neţţa ay-iwerten, yeffeγ wawal ger medden dakken d yiwen ger ilewsan-iw ad yuγalen d agellid...zzin-d mrew(10) n wussan nγant.
- Kečč tekseḍ fell-i amihi n icenga-w, tεuseḍ fell-i akken iwulem, tzemred a ţ-εaseḍ af yiman-ik ur k-neqqen ara ? Nek s timmad-iw aqlin d agellid ur zmireγ ara ad εaseγ fell-ak. Ata a s-nger belli ad dduḍ deg imensan am ugellid. Awal ad yeffeγ ger medden. Teẓriḍ dacu ak-yeţrağun seld-aya.

Zaïd : zẓriγ awk aya a yagellid, maca eğğ-iyi ad εerḍeγ yiwet n tikkelt kan, anfa-s i zzehr-iw ay-id-yawi dacu yellan. Targit xseγ a ţ-uγal d tideţ.

Agellid : Xemmem tayeḍ n tikkelt a Zaïd, ţţu taderwect aki nnek. Fern-ed(choisit) ayen nniḍen ... agerruj n yedrimen ... mraw igerrujen ... ureγ, ayen awk ur twalaḍ ula di tergit ... taqcict tahuskit(belle) ur teţţafeḍ ara am neţţat deg umaḍal... ak-rnuγ daγen ayen nniḍen ma triḍ. Uγal-ed ar teγẓint-ik(raison).

Zaïd : Taγẓint ?? ala ayaki fuγef ur-k-ţaγeγ ara awal. Tugna-ya teṭṭafar deg-i azal n snat tmerwin(20) iseggasen ayaki, aṭas i iεebba wul. Tura xas ay-nγen ur d-ḥareγ. Siweḍ-iyi kan ar lebγi-w a yagellid. Akka meqqar xas muteγ, ad mteγ am ugellid tama n ufakan ameqqran n Kali. Ayen yuran af twenza-w ad iεeddi.


Agellid : A Zaïd, teččureḍ-iyi tiṭṭ seg wass mi tqeddceḍ fell-i. D timuhblet ik-d-yebdan, tmexleḍ almi d ulamek maca gziγ-k-id acku ula d nek kkant fell-i tyitiwin am ti, yiwen ur yegzi dacu i yellan deg wallaγ-iw, akka am kečč, yiwen ur yessawaḍ ad yekcem deg wallaγ-ik ad yegzi ansi ik-d-yekka ucayaḍ(aḥaruq)...

Ur yuki ara Zaïd almi i d-yufa agellid ibedd.
-Eyya-n a Zaïd, eyya-n ak-werriγ kra n tγawsiwin ahat ak-seţţunt timuhbelt aki nnek.

Zaïd yeḍfer agellid, kecmen ar kra n texxamin anect-ilatent čurent d ureγ, idrimen, imrigen, isekkimen... Agerruj yekmumsen din dayen id-segrewnt 100 n tsutyin(générations) n igelliden.

Agellid : Acu tenniḍ deg waya a Zaïd ? Aya awk ur k-yeččur allen...ihi eyya-n yid-i ak-werriγ ayen nniḍen.

Zaïd yedda d ugellid almi anda tella tlemmast n ufakan, iwḍen ar kra n tmesrit (salon) akken meqqret dayen kan, terqem s kra n yiniten(couleurs) d awal kan. Seg tama ar tayeḍ tullas ţţawint ţţarant, ţţurarent azawan. Mlalent-ed din thuski, cbaḥa akk d temlel ; kra n tullas tuggicin, cebḥent almi d ulamek.
Yiwet ger-asent tuẓa-d tama nsen, tusa-d tekna zdat ugellid.

-Agellid : Taki d Nilofal, tucbiḥt ur yesεin azal-is deg umadal. Ma yella tεeğ̣b-ik...

Zaïd ilezlez wul-is mi ţ-iwala ; kra n thuski, kra n lqed, kra n wallen, ula d aẓru ad yeqluqel ma iwala-ţ. Yezzi-d aqerru-yis yufa-d agellid ulac-it, yefγ-ed yeğğa-t akk d Nilofal u yerra-d tewwurt fell-asen.
Nilofal tewwet amek a s-t-seţţu i Zaïd tikti ireṣṣan deg wallaγ-is maca teggum, ulac dacu ur s-texdim i wakken a s-t-sufeγ axemmem-nni seg wallaγ-is maca werğin tessaweḍ. Zrin 3 wussan d 3 wuḍan nutni weḥdessen.

Zrin 3 wussan, Zaïd yufa-d iman-is daγen tama n ugellid.
Agellid : Amek ihi a Zaïd ? Nilofal tesbeγ af wul-ik neγ ?
Zaïd : tessaweḍeḍ-iyi almi anda yiwen ur s-yessin maca amek ad beddleγ tirga i isebken deg wallaγ-iw azal n 20 iseggasen ayaki s yedrimen neγ s teqcict ? Ayen riγ mazal ur tessiwḍeγ ara.
Agellid : lebγi-k ad yaweḍ, azekka di tlemmast n wass ad dduḍ deg imensan am ugellid.

Agellid yegguni amek ad ţwagent tγawsin ilmend n wayen yebγa Zaïd.
Azekkayen deg uzal, si ṭṭaq n ufakan, yeqqim ugellid yeţwali-d ar Zaïd mi t-sulin af yilu-nni ameqqran am ugellid. Zaïd yesεedday ayen yuran di twenza-s, ass-a iḥulfa iman-is am yillu deg igenwan. Acu ar as-d-yeḍrun m’ ara d-awḍen imensan tama n tawwurt n ufakan-nni ameqqran n Kali ?
Agellid yeqqim yeţwali deg-s s tumert, iẓẓer-it amzun d agellid.
-Maca, imi tura tirga-s fγent akken yebγa, m’ ara d-yers s-ufella n yilu inna, acḥal i yezmer ad yernu di tmuddert-is ? Amek as d-tban tudert seld aya ?

Agellid izinez ar yiwen seg iqeddacen-is, isem-is Al Tarik, yenna-yas kra n imeslayen ar umezzuγ , winna yekker timiren. Yenna-yas awk amek u dacu ad yexdem.

Imensan ţţeddun deg iberdan n Lakra-Kai, medden fγen-d awk ad ẓren. Zaïd atan deg igenwan. Imekta-d kra n wawalen n yiwen akken Umussnaw zik i yennan :
«Illawen(dieux), ticki m’ ara d-siwḍen ales ar wayen yeţmenni, ţγawalen a s-t-id-ksen acku ţţagaden m’ ara yerbeḥ ad yuγal am nutni, a sen-yekkes ideggen (places)nsen ».

Imensan tura atnan qrib ad awḍen ar ufakan-nni ameqqran n Kali.
Zaïd uγalent-as-d tugniwin awk n zik, ass mi yella d aqcici amec ṭ uḥ, tirgit i iburga aţţan tuγal d tilwat, yessaweḍ ar wayen fuγef yeḥreq wul-is 20 iseggasen-aya...

Imensan ţţaẓen tama n ufakan, aqeddac i yellan yeṭṭef amehraz deg ufus-is yekkat deg yiwen akken uḍebsi n wuzzal. Tal ddeqet, tiγri teţţaweḍ ar wakin.
Ilu fuγef yedda Zaïd iteddu s ţawil ţawil, tasurrift zdat tayeḍ, maca akken i yesdeqdeq uqeddac af uḍebsi tikkelt taneggarut, Zaïd ixerxer yeγli. Ulac win i s-yeslan i lbarud n tmeγḥelt mi yeṭṭerḍeq. D Al Tarik i s-izenden s yiwet ....Zaïd yemmut.

Iḍ-nni, Agellid n Lakra-Kali yeqqim yeţmuqqul di tfekka n Zaïd yeẓlen di tmurt, win i iqedcen fell-as acḥal n iseggasen, yeţmeslay d yiman-is yeqqar-as:
Telliḍ am ugellid neγ ugar ugellid, d amexlul neγ ahat maḍi d Illu. Turaḍ s yiman-ik af twenza-k (lmektub-ik)ayen wiγer t-ţţedduḍ. D nek i iḍebbren af Al Tarik akken ak-ineγ acku ẓriγ belli win ar ay εerḍen tudert ugellid, zẓay fell-as akken ad d-yuγal am medden merra...

D wa i d asefk n ugellid n Lakra-Kai. Maca, agellid ur yeẓri yara belli mačči d aldun(balle) i t-yenγan. Al Tarik ur iḥuza yara Zaïd u tafekka-s ulac awk anda i ten-ţuγ, ur texbic ara awk...

isuqel-itt-id ar teqbaylit Amnay