Akka i imeslay Zaratustra

Ayen ad d-yeddun s ddaw d tukkist seg weḍris yura W.Friederich Nietzsche, deg yiwen n wedlis i yufraren ger wiyaḍ.
Isemma-yas : Also sprache Zarathustra.
Azwwel n tukkist-a i d-iwiγ: Zarathustra's Vorrede.. Akka i t-ibeddu :

(....)Als Zarathustra dreissig Jahr alt war, verliess er seine Heimat und den See seiner Heimat und ging in das Gebirge. Hier genoss er seines Geistes und seiner Einsamkeit und wurde dessen zehn Jahr nicht müde....

Alγu (Der prolog)
…Ad εerḍeγ a sen-meslayeγ af wayen yellan d aradfayan* : xseγ ad meslayeγ af yir amdan.
Akka i sen-imeslay Zaratustra i wegdud :
Yiweḍ-ed wakud i wakken ales ad iger iswi ger wallen-is. D akud i wakken ad yezẓu imγi n wayen fell-as d alqayan.
Tamurt-is tura mazal-iţ d tanesbaγurt(tabaγurt]. Maca, akka kra n wussan, akal-is ad yeqqel d agdal, ass-nni ula d yiwen useklu ur d-imeqqi deg-s.
Aḥlil, nessawḍ-ed ar tallit anda ales ur yezmir ad yesεu itran. Aḥlil !tiweḍ-ed tallit n yir amdan, win ur yessinen amek ţektalen turdas.
Atan ! A wen-d-werriγ danwa i d yir ales(amdan).
« Tayri ? Asnulfu ? beqqu ? Itri ? dacut wa ?, akka i yenṭeq u iγemz-as yiwen n yir amdan. Ticirkelt* tuγal zẓayet , fell-as ad ineggez yir amdan, d neţţa a ţ-yeččen awk. Iri*-yis yeğhed am win n tselluft ; i yir amdan imu γezzifet tudert.
« D nekkni i d-yesnulfan tamendit* » i nnan yir imdanen rnan myeγmazen ger-asen.
Ğğan awk timnaḍin anda tewεer tudert : acku ḥwağen lḥamu. Mazal ḥemmlen iεciren nsen neṭḍen ar γur-sen : acku ḥwağen lḥamu.
Win ihelken neγ win ur neggar laman deg wiyaḍ ar γur-sen d amegdul* : Teddun kan yiwet yiwet.
Win dγa ad yecḍen af weblaḍ neγ yiweḍ imdanen, waki dγa ar γur-sen d amexlul.
Ḥellejγar i sessen daki neγ dihin isenkar-ed deg-sen tirga d ayen kan. Ma yella swan-t s tawant, ineqqiten s ţawil s ţawil kan .
Mazal xeddmen, acku dayen i ten-iselhayen. Maca zẓran mačči dayen a ten-iseεyun.
Ur ḥemlen ad uγalen d imesbuγar, ur ran ad qimen d iẓawaliyen : yesseεyay-iten aṭas. Anwa i mazal ira ad yetṭef adabu ? anwa i mazal ira a sen-yaγ rray ? Dayen iseεyayen waya !
Tiqedεit n wakraren tella ameksa ulac ! Ran awk yiwet n tγawsa, myeεqalen n way’ ger-asen : win ur ten-iwufqen, atan xas a yeḥseb iman-is d amexlul.
« ass mi akkenni, imdanen tuγ-iten awk d imexlal » i nnan widak yeţmeyyizen. Rnan myeγmazen ger-asen.
Zẓran dacu yeḍran, εusen iman-nsen : akken ur ţfakkan ara amesxer.
Mazal-iten ţnaγen, maca ţţuγalen timir : i wakken ur seqraḥen ara tiεebbaḍ nsen.
Deg uzal γur-sen ayen i ten-iseldhayen, mi d yiweḍ yiḍ, γur-sen ayen nniḍen : maca bedden af yiman-nsen.
« Nesnulfa-d tamendit » i s-nnan yir imdanen, rnan myeγemazen ger-asen.

Da i yeţfakka yinaw* amenzu n Zaratustra, win imu qaren « alγu » ; acku timiren kan bdan ţţuzẓafen yemdanen i yellan zzin-as-d. « Ini-yaγ-d anwat uneggaru-a deg yemdanen a Zaratustra, err-aγ awk d yir imdanen am wi fuγef i d-meslayeḍ ! Nekkni si tama-neγ a nger am akken ur d-enniḍ kra, a nerr amzun ur neẓri a «yamdan i yugaren awk medden ! » Dγa serḥen-as d taḍsa, sṭerḍiqen ula s yilsawen.
Zaratustra iγaḍ-it lḥal, yenṭeq ar yiman-is yenna: « ur d-gzin kra deg wayen i sen-nniγ, ur lliγ seg wid imu smeḥsusen .
Aṭas i kkiγ deg imudaγ, selleγ-asen i isaffen ma treğriğen akk d isekla : atan yufa-yid lḥal am win iheddren i tγetṭen***.
Iman*-iw d alqayan, d azedgan am wedrar. Nutni γilen-iyi d aderwic neγ d bu-tkerkas.
Atan tura ţmuqqulen-d γur-i dessen : simal dessen, simal rennun di tkaruhit. »

6.
Yekka akken lḥal almi i ţeγli-d kan tsusmi, gugmen yilsawen. Imdanen yellan awk di rreḥba zzin akken ma llan ţmuqulen winna yeţţuraren af wemrar deg igenni. Yefγ-ed seg yiwet akken n texxamt u yebda ileḥu af wemrar s nnig iqerra nsen. Akken i d-yiweḍ ar tlemmast n wemrar, almi i d-yeffeγ kan yiwen nniḍen s deffir tewwurt-nni. Kra n ugeεmir akken a s-tiniḍ d axuruṭu. Yuγ-ed tikli af wemrar iḍefr-ed amezwaru-nni. Yebda yeţţuẓaf u yeţsuγu-d fella-s, yeqqar-as : « Aha ! Lḥu a yiwen uqejdaḥ, aha-k a yiwen ufenyan, a yaqewwad, a yudem n siwreγ !
Balak ak-in-sawḍeγ γiwel! Acu i teggareḍ af wemrar-a ? Aha eğğ abrid i wi’ k-yifen !» Akken ihedder yeţţaẓ-ed cwiyya cwiyya ar γur-es, maca akken i d-yiweḍ ar tama-s u teggra-d terdast ger-asen medden sbedden awk iman-nsen ţrağun dacu a yeḍrun.
Tedṛa-d twaγit, susmen awk medden : axuruṭu-nni yefka yiwet n tussiqt u yenṭu af umezwaru-nni i s d-ibedden af wemrar. Winna icekkel wemrar af iḍaren-is , yenhetwi-d s ufella n wemrar iredwi-d ar tmurt…tekker trewla ger yemdanen.
Yeγli-d tama anda akken yella Zaratustra maca ur yenxixelen ara seg wemkan-is. Winna yezẓel af tmurt, rẓan awk yeγsan-is, d acerreg i tcerreg tfekka-s, maca ur yemmut ara.
Ur yuki ara (ur ifaq ara) almi i iwala Zaratustra yekna-d tama-s : « Acu txeddmeḍ da ? i s-yenna, ḥṣiγ belli cciṭan yetṭafar deg-i acḥal aya , atan tura iceyyeε-id win ay iseγlin : tzemreḍ a s tiniḍ ay yanef?
-Uḥeq aserhu-w** ar wayen akka i d-udreḍ ur yelli : ur yelli cciṭan ur telli tmest. Ak-yeffeγ yiman(rṛuḥ) ur teţţakiḍ. Ur ţţaggad(ţţag°ad) kra ! »
Winna akken yeẓlen af tmurt irefd-ed allen-is s tmara. « Ma yella wayen akka iy-d-qareḍ d tideţ, ihi ulac deg-s ma yella mmuteγ? Azal-iw d azal uγersiw-nni i sazalen s tyita af kra n tleqmatin.
Ala, i s-yenna Zaratustra, D kečč i yerran iman-ik deg umihi s leqdic-ik, ulac lεib deg-s waya. Atan leqdic-ik ar wanda i k-yessaweḍ : d nek ak-yeγzen aẓekka a k-meḍleγ s ifassen-iw. »
Akken i s-yenna Zaratustra aya, winna yeţmeţaten ur t-id-yuli wawal, yeggugem maḍi, maca irefd-ed afus-is amzun yeţḥewis-ed afus n Zaratustra akken a t-yesnemmer*.
….
Tudert n wemdan dayen yessewhamen, tezga ur tesεi lmeεna : Ula axuruṭu yezmer a ţ-iseγli.



Amawal :
Aradfayan = désagréable
Ticirkelt = terre (globe)
Iri = race (γur-es inumak nniḍen = vie, cou..)
Tamendit = joie
Inaw = discours
Iman = âme
Aserhu = honneur
Snemmer = remercier
** Nekkni neqqar : s yixef-iw. Neγ : s uqerru-yiw.
*** di telmanit yura-t "Ziege".

Isuqel-it-id si telmanit ar teqbaylit : Amnay