Tamacahut The Five Boons of Life sγur Mark Twain (1835-1910) , yesuqlitt seg teglizit Amor REKIS

Ixf amezwaru:

Di zzman amezwaru tefγas-d tewkilt i yiwen ilemẓi , tewwi-d yid-s deg uḍelaɛ tamusni, tayri, tabaγurt, zzhu d tmettant. tenna-d: hatent-aya tunḍicin, ddem yiwet , anef i tiyaḍ, maca γurek fren s ttawil acku yiwet kan seg-sent i yelhan.
Ineṭq-ed ilemẓi s uγiwel yenna-d: "ur yelli uxemmem." Yemmeγ γef zzhu.
Yeffeγ ar ddunit , yefka-tt kan i jjiḥ, yettnadi γef tiẓeṭ, tiqaqacin d ussan tḥemmel temẓi maca zzhu nni akk yezga wezzil yesegwra-yas-d ala terẓegt d nndama, ur yerri aḍar armi t ksan medden deg awal .Taggara inna-d : a yiseggasen weddreγ! Limer zemreγ ad ferneγ abrid wis sin , tikkelt-a, ur tettɛeddi γef uqerruy-iw .

Ixf wis sin:

Din din tbedd-ed tewkilt zdat-s, tenna-d : gwrant kuẓ seg tunḍicin , rnu ales afran, mekti-d akud yettazzal, ur yettraǧu ara, yiwet kan seg sent ig wulmen .
Argaz ixemmem ixemmem armi, ticki iddem tayri ur d asen iger tamawt i wallen n tewkilt mi d ččurent d imeṭṭi.
Infel useggas γef gma-s, yeqqim urgaz zdat yiwen uẓekka, axxam d ilem yesergagay, netta yettxelwa d iman is, yenna deg ul-is:
Ruḥen yiwen yiwen, ǧǧan-iyi , tura d nnuba n taɛzizt n ul iw , teẓẓel da d-tasemaḍt zdat- i , gwriγ-d deg iγilifen, di tal tasaɛet n talwit texdeɛ iyi deg-s tayri taγeddart, msewqaγ yid-s xelṣeγ taɛkemt isenzafen n uneγni, seg ul n ul inu a-kem-yexdaɛ Ṛebbi a tayri !

Ixf wis III:

Ales afran i-s-tenna tewkilt ,selmedn-ak ussan tamusni d usekkud, akka i d ddunit , gwrant kraḍ tunḍicin , yiwet seg-sent kan ig weqmen ….. wiyak! Fren s ttawil tikkelt-a !
Argaz isaɛteb tamelγiγt-is armi yuγal yefren tamusni. Tawkilt tegr-ed nnehta annect, teṭṭef abrid-is .
Ruḥ a zzman, tuγaleḍ-d a zzman d wamek tuγal-ed tewkilt, tbedd-ed deffir urgaz yeqqimen i iman-is , ussan ttezzin , netta yettxemmim, teẓra ayen yellan di lbeḍna-s .
Isem-iw inuda akk timura , sked w'ur t nessin, ala deg iseγ i-t-id-ttadren, thennaγ kra n ussan. Acḥal i wezzil ukud nni. Tekka-d tismin, iḍefri-tt ucemmet, sakin tiguriwin d icehriren, tin γers karuh d miḥyaf ttemseḍfaren. Syen asmesxer d uɛekki i yellan d-tawwurt i nnger. taneggarut aγiḍi: d-tanṭelt n tmusni .
Ah a lḥif d terẓagt n tmusni! Tesexnanaseḍ amdan mi meẓẓi leqqaq , γeḍrent leḥbab, ttin-as-d ixṣimen. Yettuγaḍ mi d teskeckec tewser.

Ixf wis IV:

Rnu fren, i-d-tenna tewkilt .Snat tunḍicin i-d-yeggran, ur gezzem layas.Tin yelhan mazal-itt gar-asent.
Tabaγurt! D nettat i t-tazmert ! ziγ derγleγ! I-d-yenna urgaz . Tura meqqar, tudert tuklal a-tt-nedder. Ad-ṣerfeγ, ad-beẓɛaγ, ad-swehmeγ medden . Amɛekki d uḥeqqar a-ten-sexnunseγ deg uγebbar. Ad-teqqed tasa-w yeččḥen seg tismin nsen yesqwejqujen . Ad kesbeγ akk tiγawsiwin lɛali d tin yesefraḥen, tidak yettaǧǧan ul yenecraḥ, akk ayen tḥemmel tfekka, yettɛuzzu umdan. Ad aγeγ aqader, ad aγeγ aɛuzzu, ad aγeγ aɛbbed ! … ad aγeγ yal ajenjun n tudert ara ikecmen ssuq n ddunit m leγrur .Aṭas n ukud i weddreγ, diri-t ubrid id wwiγ d wamek ferneγ.Maca ulac aγilif , jehleγ, ur ttmeyizeγ imiren, ddmeγ kan ayen γilaγ yufrar.
Zrin kraḍ iseggasen wezzilen yewḍ-ed wass yeqqim urgaz yettergigi, deg yiwet n taɛrict di ṭṭlam d uṭṭelis , tesdendn-it twaγit .udm-is kerzen-t ussan , allen-is d arquqen, iceṭṭiḍen yelsa rkan , qqersen akk, yettγeẓẓiz deg iḥder n uγrum yeqquren , yettmeslay i iman-is
Ad yefk nnger i tunḍicin akk n ddunit acku d tikerkas d usmesxer kan , ččuren d ddγel akk mačči d tikcin, d areṭṭal kan . zzhu, tayri, tamusni, tabaγurt, d acebbeḥ n udem s ufella. D acu ten ? d aqraḥ , d aγilif d uneγni , d ddel, d tiggulelt. Ziγ tesawl-ed tidett tewkilt .deg ayen akk yellan deg uḍelaɛ yiwet kan i yesɛan azal. I meẓẓiyit tunḍicin niḍen tura zdat tin meqqren.

Ixf wis V:

Tuγal-ed tewkilt tewwi-d yid-s daγen kuẓ seg tunḍicin maca tamettant txuṣ , tenna-d, fkiγ-tt i ugrud amelḥan ur yessin tigert maca yumen-iyi , yesuter deg-i a-s-ferneγ, ma d kečč teggumaḍ .
A tawaγit ! d acu iyi d yegwran ?
yegwra-ak–d kan ayen tuklaleḍ , lihana n tewser!