Di tγiwanin d tudrin, d-yezzin i temdint n Buzgan ama d Ilula Umalu neγ d at Ziki, ussan-agi tban-asen-d yiwet n liḥala d tamaynut. Yal ass ttwalin nnig iqerray-nsen, deg igenni kra n warrac yettafgen s “iferseksaren” (les parapentes). Imdanen ur uγen ara tannumi s waya, γef wanecta a ten- nwali d wid iwehmen mliḥ.
D tidett d ayen yessewhamen acku di tmurt-nneγ ur yelli ara ṣṣenf n waddal-agi. Maca deg useggas iεeddan 2006 ruḥen-d kra n Irumyen yettwamuzgen deg waddal n idurar s laεraḍa n tdukli “Club Evasion” n at Yeğğer. Gan tannant n waffug s “iferseksaren”(parapentes) i kra n yelmeẓyen n tdukla-yagi ilmend n 8 wussan.
Ufraren-d kraḍ yelmeẓyen, AΣMARA Idris, QASI Σebdslam d ΣABDELLI Salim. Nutni si tama-nsen selmaden ayen ssnen i yemdukkal-nsen. Dγa ussan-agi ideg igerrez wakud yerna yella cwiṭ ubeḥri, ttfarasen yal ass. ṣṣawaḍen ttafgen-d alamma d 3 n tikkal deg wass. Degmi ara tt-id-ṭṭfen di tqerruyt n uswel n at Ziki alarmi d annar n taddart n Saḥel γef leεli n 750 ar 800 lmitrat, azal n 20 n dqayeq nutni d affug deg igenni.
Yuγ lḥal Amenzu-yagi AΣMARA Idris, yufrar-d deg useggas-nni n 2005 d alγuγ n tmurt n Lezzayer di ṣṣenf n waddal n walluy neγ n walbab idurar (Escalade de montagnes).
Ayen ara yesḥisef umdan, d imḍebren n waddal tmurt-nneγ, ur d-yelhin ara s warrac-agi, ur nefki ara azal i ṣṣenf n waddal n idurar.
Gten warrac d-yezgan deg idurar εlayen yettgen addal n tucga γef udfel, neγ n umerreḥ deg yefri γer wayeḍ, neγ albab n idurar d waffug-agi iγef d-nemmeslay maca ttgen-t i yiman-nsen kan mebla ma yella wi ara yilin ilmendad-nsen akken ad sεun immal deg wanect-a.
Nura Amara i imyura.net
G.M. uran-d fell-asen kra n iγmisen ifransawalen am Soir d'Arlgérie akk d la dépêche de Kabylie