Illa uzeddam γur-s sin warraw is, d-imeẓyanen, akk d tmeṭṭut is. Tameṭṭut is tehuski aṭas, d-tasekkurt i d ifka Ṛebbi deg-s.
Iṛuḥ iznuzu isγaṛen, ittawi-d ayen tetten warraw is d tmeṭṭut is. Armi d yiwen wass, tenna yas tmeṭṭut is: “ ay argaz, kečini la txeddmed fell-aneγ deg kraḍ(3) yid neγ, nek d warraw ik. Tura ur aγ d-ttqaddiḍ ara. Tura, iyyaγ, sebγ iyi, err iyi d-taberkant am taklit; ad ttedduγ ula d nek yid-k, ad znuzuγ taγeddiwt i waken ar a d-nettawi snat(2) tqaṛkucin i warraw nneγ; ma ulac, keč iman ik ur illi ara wayen ar a d-xedmeḍ.
Iṛuḥ, iwwi-d abbuxen. Iḍla yas ten i tmeṭṭut is. Iwwi tt yid-s. Netta izeddm-d isγaṛen, iznuzu ten, nettat tetteks-d taγeddiwt teznuzu tt.
Armi d yiwen wass, iṛuḥ-d yiwen umẓabi, yufa tt id deg suq teznuzu taγeddiwt. Iɛeql itt d-tameṭṭut tillelit, ur telli d-taklit, acku irra tamawt dakken tecbeḥ tehuski, s tmuli kan i teslufḍa udem is. Inna yas: “zenz iyi taγeddiwt, a taklit agi.” –Tenna yas: “ad ak zenzeγ.” –Inna yas: “Iyyaγ, awi yi d taγeddiwt ar uγrabu(taflukt) inu, sinna am fkeγ ayen i y tettalaseḍ.”-Tenna yas: “Iyyan, ad akk tt awiγ.” Tewwi yas taγeddiwt nni akken yuγ fell-as.
Armi is tt tessaweḍ ar uγṛabu ines, inna yas:”Ali-d γer da tura, ad am fkeγ idrimen im.” Tuli. Akken tekcem ar uγṛabu, iqqen fell-as tawwurt. Aγṛabu iqleɛ, ibda tikli. Iwwi-tt.
Iqqim urgaz is akk d warraw is. Iqelleb fell-as urgaz is; ur tt yufa ara. Inna deg ul is: “Tura, nek lliγ znuzuγ isγaṛen, ttawiγ-d taqeṛkuct n uγṛum i warraw iw. Tura giγ tt i iman iw. Wwiγ yemmat sen i waken ar ad iyi tɛiwen, zun, deg uγṛum nsen. Tura tṛuḥ. Wissen wi’ tt iwwin; ur ssineγ nγan tt; ur ssineγ amek teḍra yid-s.” Inna yas deg ul is: “Tura, nek ad ṛuḥeγ, ad awiγ arraw iw; anda iyi ihwa, ad kecmeγ yis sen; ɛyiγ seg tmurt a. Deg ass mi d kkreγ nek deg-s, anagar urfan i y tesseṛwa.” Iṛuḥ, iwwi arraw is. Armi iwweḍ ar yiwen wasif, yufa t meqqeṛ; ur zmiren ara warraw is ad zegren. Yiwen, iǧa t din: wayeḍ iwwi t ad at izger. Armi d izger, iǧa t din ar iri n wasif. Yuγal-d ad irnu wayeḍ ad at izger. Armi d-iwweḍ ar tlemmast n wasif, iwwi t wasif nni.
Qimen warraw is, yiwen deg wgemmaḍ, wayeḍ deg wgemmaḍ a. Ibḍa ten wasif. Iluɛa umeqṛan nni gma-s ameẓyan, inna yas: “ a gma. A k weṣṣiγ γef yiwet n temsalt; nekni aqlaγ nemfaṛaq(nemezzi). Babat neγ iwwi t wasif, immut, naγ ur nessin amek teḍra yid-s. Tura ad ak iniγ yiwen umeslay ma ad taγeḍ awal iw.” Inna yas: “Ṛuḥ. Anda tewwḍeḍ, ḍfeṛ kan taγuṛi, lmed tussna anda tt tufiḍ, ma ur tt tufiḍ, nadi fell-as. Ɣur-k ad tḍefṛeḍ abrid nniḍen !” Inna yas: “kra n wanda ad tawḍeḍ ɛnu kan iγerbazen(lakulat), tedduḍ akk d imusnawen.”-inna yas umeẓyan nni: “yuqem, a gma. Anda kecmeγ, ad ɛnuγ ala taγuṛi.” Ihi ṛuḥen. Yiwen ikka ar tama s anda d ttali tafukt, wayeḍ ikka ar tama anda tγelli tafukt.
Babat sen isusf it id wasif, ur immut ara. Nutni ṛuḥen; γilen babat sen immut. Netta akken i t iwwi azuḥ wasif, iḍeggr it id. Iffeγ-d seg wasif, iṛuḥ-d, iwweḍ-d ar ideg nni anda iǧa arraw is, ur ten yufa ara. Inuda fell-asen armi iddeh, ulac. Ittru, inna yas: “A Ṛebbi, acu xedmeγ gar-i yid-k ?” Iṛuḥ-d sinna. Armi d iwweḍ ar yiwet teγṛemt(tamdint) yufa-d tawwurt teqqen. Iṭṭes dinna ar tewwurt.
Ziγ nni deg teγṛemt nni immut asen ugellid. Nnan as: “win d-nufa γef tewwurt n teγṛemt, d-netta ad yuγalen d-agellid. Armi d-azekka nni, kkren-d imeqṛanen n teγṛemt, sseqsan-d ar tewwurt nni. Ufan t id dinna. Nnan as :”iyya. D-Rebbi i k id ifkan, ad-tuγaleḍ fell-aneγ d-agellid.”
Iṛuḥ, yuγal d-agellid. Kra n win ar ad ixedmen yid-s d-azazraf(lqaḍi), ayur naγ sin, ad a t ikkes acku ur issin ara ad iγdem(ad iḥkem) s uzref. Inna yasen i wat n teγṛemt nni: “Tura, nek d-agellid fell-awen. Ur ufiγ ara gar awen win ad ixedmen yid-i d-azazraf akken iwulem. Tura xseγ ad iyi d-tawim win illan d-amusnaw ameqṛan n isuḍaf(lqwanen) illan deg wsamar, d umusnaw ameqṛan illan deg wmalu.”
Ṛuḥen. Wwin as d seg wmalu, seg wanda iγelli iṭij, amusnaw ameqṛan n isuḍaf illan dinna, wwin as d seg wsamar amusnaw ameqṛan n isuḍaf illan dinna diγen. Ihi wwin as d sin izazrafen. Netta, ziγen d-arraw is i sin yid-sen. Maca ur ten iɛqil ara; nutni diγen ur t ɛqilen. Ur myeɛqalen deg waygar asen acku qimen aṭas ur myagaren ara. Deg ass mi mezzin(msefṛaqen) armi d ass nni imyagaren. Nutni γilen yiwen n at usamar wayeḍ n at umalu. Myagaren dinna ad xedmen d-izazrafen. Yufa ugellid wid iḥekmen s izerfan. Yuγal iḥemml iten, γur-s taflest deg sen.
Amẓabi nni i s iwwin tameṭṭut is, irra t, d-amdakel. Ittas-d umẓabi nni ar tmurt nni anda iḥkem. Azeddam ur iḥṣi ara d win i s tt iwwin. Amẓabi diγen ur iḥṣi ara tinna yuker d-tameṭṭut n ugellid.
Armi d yiwen wass, inna yas uzeddam nni i umẓabi nni:”As-ed ar γur-i a nens akken, a-nqeṣṣer nek yid-k.” –Inna yas umẓabi:” Ay agellid, nek ur ttkileγ γef uγṛabu(taflukt) inu.” –Inna yas uzeddam:”As-ed kan. D nek ar ad iceyɛen wa ar ad ak tt iqaṛɛen. Atenin sin irgazen d izazrafen; a ten tamneḍ γef tudert ik. Nutni ar ad iṛuḥen ad nsen dinna ad att qaṛɛen.“ -Inna yas:”Yuqem.” Armi d-tameddit, amẓabi iṛuḥ-d γuṛ agellid.
Nutni ṛuḥen ar uγṛabu. Ziγ nni d Ṛebbi yraden dakken deg iḍ nni ar ad myeɛqalen deg aygar-asen. Nutni ad meslayen γef ayen iḍran yid-sen; Yemmat sen a d-smuzgut.
Ṛuḥen. Armi d wwḍen ar uγṛabu nni n umẓabi. Yiwen iqqim ar tama, wayeḍ ar tama nniḍen. Inṭeq umeqṛan, inna yas i wmeẓyan:”Iyyaγ ar da, a nqeṣṣer. Acuγef akka ineqim yal yiwen iman is ?” –inna yas umeẓyan:”Nniγ ak nek mektaγ-d ayen iɛeddan fell-i. Tura, iyyaγ-d ar da. A nqeṣṣer iḍ agi. Yak, tura, nek yid-k zun d-atmaten !” –Inna yas umeẓyan:” D-tidett.” Iṛuḥ-d γur-s. Qimen, ttmeslayen. Inna yas umeqṛan nni:”Aṛǧu. Tura ad ak d-ḥkuγ ayen iɛeddan fell-i. Imi tettruḍ keč, ad teẓreḍ ayen ittɛeddin γef irgazen.”
Ibda iḥekku yas-d, inna yas:”nek lliγ d gma akk d baba akk d yemma. Illa babat neγ iznuzu isγaṛen, ittawi yaγ-d ayen ntett nek d gma. Yiwen wass, tenna yas yemma i baba: ay argaz, tura keč la txeddmeḍ zun γef kuẓ(4) medden. Iyyaγ ḍlu yi tamuli a d-bineγ d-taklit, ad ttedduγ yid-k, ad znuzuγ ula d nek taγeddiwt i waken ar a d-nettawi aγṛum i warraw nneγ. –iṛuḥ baba iwwi-d tamuli, irra yemma am zun d-taklit. Ṛuḥen ad aγ d-awin ayen a neč nek d gma. Armi d-tameddit baba iwwḍ-ed. Yemma ur tban ara. Iddeh ittnadi baba fell-as a tt yaf, ur tt yufi ara. Ikkr-ed, azekka nni, iwwi-yaγ nek d gma. Inna yaγ: iyyaw ay arraw iw a ken awiγ anda ad tečem s liser. Iwwi yaγ. Nṛuḥ. Armi newweḍ ar yiwen n wasif nufa t meqqeṛ. Izger iyi nek d-amezwaru. Yuγal-ed ar gma a t id-irnu. Armi iwweḍ ar tlemmast n wasif, iwwi t wasif nni. Neqim nek d gma. Netta iṛuḥ; ur ssineγ anda iγli. Nek ṛuḥeγ diγen, ur ǧiγ tasga. Maca ḍefṛeγ taγuṛi. Tura aqli wanda d wwḍeγ diγen; aqli awi-d ukan, d-azazraf n ugellid. Maca ul iw ur izhi ara, acku yemma ur ssineγ amek teḍṛa yid-s; gma diγen akken; baba, iwwi t wasif. Tura ẓer ayen iɛeddan fell-i ma illa iɛedda fell-ak wanect a fell-ak keč.”
Ikker-d winna, umeẓyan nni, immeγ-d issudn it, inna yas:“ihi d nek i d gma k.“ –inna yas:”D tidett !” –inna yas:”s ixf iw ar d nek i d gma k. Tura awi-d ukan imi nedder armi nemyagar!” Myeɛqalen.
Ziγen yemmat sen tella dinna deg uγṛabu nni, teḥbes deg texxamt. Tesla yasen imi ttmeslayen akk akken. Tettru. Armi d-azekka nni, iṛuḥ umẓabi ar uγṛabu ines. Nutni ṛuḥen-d ar uxxam n teγdemt. Iwweḍ umẓabi ar uγṛabu, illi-d tawwurt γef tmeṭṭut is. Yufa tt tettru. Imbeddel udem is. Inna yas:”Dacu i kem yuγen ?” –tenna yas:” akka tṛuḥeḍ tsnedheḍ-d fell-i ilfan, kra ikka iḍ ur iyi ǧin ad ṭseγ. Bγan ad rẓen fell-i tawwurt.”
Iṛuḥ-d umẓabi ar ugellid, inna yas:”Akka itḍeṛṛu γef win ittaγen awal!” –inna yas ugellid:”Acu γef ?” –inna yas umẓabi:”Tenniḍ: γuṛ-i sin a ten tamneḍ γef teṛwiḥt ik. -ṛuḥen ar uγṛabu; bγan ad ṛẓen tawwurt γef tmeṭṭut iw!” –inna yas ugellid:”Ṛuḥ awi tt-id γer da. Ad sleγ i imeslayen is dacu ar a d-tini.” Iṛuḥ umẓabi, iwwi tt-id.
Armi d tewweḍ ar ugellid inna yas:”Ini yi dacu i m xedmen. Tura ad gezmeγ iqeṛṛa nsen; kem teṭṭiliḍ.” –tenna yas:”A mas inu, ur illi wayen i iyi xedmen. “-Inna yas:”Acuγeṛ, ihi, tettruḍ ?”-tenna yas:”A mas inu, ttruγ; wi d arraw iw. Sliγ asen imi ttmeslayen γef ayen iɛeddan fell-asen, ɛeqleγ ten d-arraw iw i sin.” –inna yas:”amek ? Kem d-tameṭṭut n umẓabi; wi, yiwen n umalu, wayeḍ n usamar.” –tenna yas:”A mas inu, arǧu ad ak d-ḥkuγ amek teḍṛa yid-i. A k d-ḥkuγ akken ttmeslayen diγen nutni iḍelli.”-inna yas:”Ḥku-d.” Teḥka yas-d akk amek tella tmacahuṭt.
Ikkr-ed ugellid nni, inna yas:”ihi, kem d-tameṭṭut iw; wi d-arraw iw. Awi-d ukan, aqlaγ nemyagar akk !” Inbeh γef isulta ines. Ṭṭfen amẓabi, sseṛγen t.
Iqim uzeddam d-agellid. Teqim tmeṭṭut is γur-s. Arraw is d-izazrafen. Tameṭṭut nni ikks as umẓabi tebrek nni, tuγal am akken tella zik d-tamellalt. Qimen aṭas n wakud, nutni llan akken ibγan. Ttun ayen iɛeddan fell-asen zik.

Uccen a t inɛel Ṛebbi ! Nekni ad aγ imneɛ Ṛebbi ! Uccen idda deg umadaγ. Nekni nṛuḥ deg ubrid. Netta iwt aγ-d s tesfenǧtin neča tent. Nekni newt it s tqeṛṛumt nγeḍl it.

(Winna)