Ukkuẓ isefra d-yesmuḥyet Sεid At Mεemmer γer teqbaylit
1)- Tilelli(Liberté) - Paul Eluard –
Ad aruγ isem-im
Γef zmamat-iw d ṭṭabla uγerbaz
Γef isekla ur yezmir yiwen ad at-ten-yeṛṛeẓ
Γef rrmel, γef wedfel mi ara d-yeddem aεekkaz
Ad aruγ isem-im
Γef isebtaren akk γran medden
Γef icebḥanen ideg ccix ur yura ur yedden
Γef weẓṛu, idim, iccer lkaγeḍ neγ iγiγden
Ad aruγ isem-im
Γef leḥmuregga n wuraγ
Γef lfuci n Ḥmed Umerri-nneγ
Γef tcacit n yal d agellid ssneγ
Ad aruγ isem-im
Γef tẓegwa n tniri
Γef leεcuc d isennanen i tziri
Γef usiwel n temẓi-w mi ara s-d-tuγal teγri
Ad aruγ isem-im
Γef tunṭicin ineglusen n yiḍ
Γef weγrum amellal n wass ay ul triḍ
Γef lawanat yemyexḍaben teẓriḍ
Ad aruγ isem-im
Γef tfawtin usigna igenni-iw azegzaw
Γef tala n yiṭij iγemlen zdat wallen n Wezwaw
Γef tasift yetteksen fad i yimi mi ara yekkaw
Ad aruγ isem-im
Γef yal iger, γef ugemmaḍ
Γef iferrawen n wefrux ma yessegmaḍ
Γef tsirt n tili ideg nettḥulfu i kra d asemmaḍ
Ad aruγ isem-im
Γef yal abbu n tafrara
Γef yillel d lembaber merra
Γef Ğerğer ur sεin-t akk tmura
Ad aruγ isem-im
Γef ifurran usigna
Γef tidi n rrεud diγenna
Γef iberquqen ugeffur mi d-yerna
Ad aruγ isem-im
Γef yal talγa iberrqen
Γef nnaqusat n yinan yettwamerrqen
Γef tidet m wul ireqqen
Ad aruγ isem-im
Γef tebriṭ yettwaberrzen
Γef iberdan isaxen yeddrebzen
Γef imeḍqan ideg medden akk teddzen
Ad aruγ isem-im
Γef teftilt yettaγen imiren
Γef teftilt deg wallen-is mi ara tberren
Γef yexxamen-iw seddaw yiwen ssqef, yeffren
Ad aruγ isem-im
Γef lfakya yebḍan γef sin
N lemri yakkd texxamt-iw a win ur tt-nessin
Γuf wusu-w ideg ur d-grint texnanasin
Ad aruγ isem-im
Γef weqjun-iw aleggaγ iṣeqqḍen.
Γef imeẓẓuγen-is ibedden
Γef ilabbaḍen-is a medden
Ad aruγ isem-im
Γef lecqayeq n tewwurt-iw
Γef ijeqduren akk n wexxam-iw
Γef teḍṣa n tirgit n wul-iw
Ad aruγ isem-im
Γef tunṭicin akk nuklal
Γef yenyiren imeddukal
Γef ifassen akk yeẓẓlen, mi ara ten-nwali tikkwal
Ad aruγ isem-im
Γef ṭṭwaqi n tmuffirin
Γef icenfiren yettrağun mazal tt-frin
Di leεli sennig tsusmi n tudrin
Ad aruγ isem-im
Γef lγiran-iw yerwin
Γef ikankilen-iw d-yeγlin
Γef leḥyuḍ n teqqreḥ-iw yulin
Ad aruγ isem-im
Γef leγyab war asirem
Γef tewlawalt tabuεeryant yeqqes wezrem
Γef tseddarin n tmettant m lhemm
Ad aruγ isem-im
Γef tezmert d-yuγalen
Γef kra ttagaden medden irewlen
Γef usirem war amekti n wussan yuzzlen
Yerna s wafud umeslay
Ad bduγ ddunit tamaynut
Luleγ-d akken ad kem-issineγ
Akken ad am-ssawaleγ
Tilelli
2)- Sliγ tugim kra yellan d leqraya
(Ich habe gehört, ihr wollt nichts lernen)
- BRECHT-
Sliγ tugim kra yellan d leqraya
Ad iniγ: Twala-ken-id
Tameddit-nwen teḍmen i tt-tettwalim
Qeεden-awen-tt imawlan
Ugur ur ken-yekkat
Ur k-terri tmara ad teγreḍ
Qqim kan ihi akken telliḍ
Akken sliγ daγen
Ur yelli lettkal γef tegnatin n wass-a
Lḥaṣul ma yeḍra-d kra
Atan yella yemḍebber-ik
Ara k-yemmalen abrid
Akken ur ken-yettxaṣṣa wacemma
Γran-d γer widak
Yessnen tamusni
D-yettafen ddwa i yal d aṭṭan
Di yal lawan
Seg wakken deg waṭas yid-sen i yellan
Ur teḥwağeḍ ara ad tessemḥiḥdeḍ ula d aḍad-ik
Tidet kan, lemmer mačči akka ay tella
Tili ad k-terr tmara ad teγreḍ
3)- Lliγ sεiγ tameṭṭut d lalla-s n tilawin
(Ich hatte eine liebe Frau) – BRECHT –
Lliγ sεiγ tameṭṭut d lalla-s n tilawin
Ccbaḥa-s ulac-itt akk di yemma-s n ddunit
Ata yusa-d lqebṭan
Yenna-d: Aha kker syin, ax ddem abeckiḍ-agi γef tuyat-ik
Dγa nnuγeγ γef izerfan n kra tγawsa
Tameṭṭut-iw teṭṭeṣ d wayeḍ
S wannect-a tekkes fell-i sser almi dayen kan
Ur tṣeḍḥa ur tenneḥcam, i d as-nniγ i wul-iw
Ad as-felqeγ axenfuc-is i tmeṭṭut-iw
Ula d nekk d abergaz tikkwal
Yerna lemmer ad uγaleγ ad waliγ kra n lqebṭan ass-a
Ad as-zwiγ tabeḥlus-is ufuḥan
Lemmer mačči d yir aqjun i yelliγ
Tili ata sqedceγ xerṣum yiwet tikkelt allaγ-iw
Ahat yella kra walaγ imiren d urqim
Yerna ahat daγen sakin ad iliγ rniγ tikkelt ṭṛad
U yerna lqebṭan-nni ad as-iniγ:
Tefkiḍ-iyi-d lfuci
Ihi tura riγ ad ssufγeγ aεbar
Zwir akka zdat-i ad ak-tekkiγ i kečč d amezwaru
4)- Kemm a taṣegadt iselman, a taqcict tucbiḥt
(Du schönes Fischermädchen) - Heinrich Heine –
Wa nnaγ a taṣeggadt iselman, a taqcict tucbiḥt,
Awi-d ddewzan-im s iri n yilel;
Yya-d qqim γef yidis-iw,
Anef-aγ ad nemyeẓmaḍ ifassen.
Senned-d taqerrut-im s ul-iw
Ur yelli acu ara tagaded;
Yal ass kemm tettamneḍ
Ilel-agi izehren yeskefkuf.
Ul-iw yettak anzi γur-s, yilel,
Ula d netta yesεa tiεeğğağin-is d lemwaji-s,
Yakkd twizet yettirriqen
Tqeggel di telqaεt-is.