I yiman n dda Lmulud At Mεemmer.
Kra n temseεraq d kra n yenzan
Si taddart “Tadcirt”, taγiwant n Tefreg (Lberǧ-Buεrariǧ)
Sγur: Lεid U Reǧdal
Lεid U Reǧdal, ibedd d wis-kraḍ (3) seg uyeffus.Tawleft-a tettwaṭṭef-d ilmend n terzeft i tga terbaεt “Tigawt d wawal” γer uẓekka umeγras (ccahid) amenzu n tefsut taberkant: Masinisa Germaḥ.
Timseεraq
(Timḥuǧǧay neγ d acu-tt, d acu-tt ?)
1-Ya ḥdenden, ya mdenden iγez (iγaz) amdun igen?
Tifrat: Acbayli.
2-Ibedd γef ṣṣur, yeγγar amenṣur?
Tifrat: Ayaẓiṭ (ayaẓiḍ).
3-Sin ibawen nudan-d akk tamurt igawawen?
Tifrat : Aṭṭucen ( allen).
4-Tagemmust-iw n ẓẓεefran, tnuda-d akk iγeẓran?
Tifrat: Tiziri.
5-Sin bedden, sin mmesbedden, sin qqaren ṭṭax, ṭṭax?
Tifrat: Aẓeṭṭa.
6-Sin leṭyur (leḍyur) ttemγababen (ttemyenqaben),taninna teqqaz-asen; lbaz yettṣeffir-asen?
Tifrat: Izgaren, tagersa d ufellaḥ.
7-Jbiγ i tiγilt, rniγ i tiγilt, ufiγ sut Rebbi jeddbent?
Tifrat: Tileggatin (d imγi ).
8-Jbiγ i tiγilt, rniγ i tiγilt, ufiγ sut Rebbi xennqent?
Tifrat: Tulawin mi ara ttcuddunt iyeddiden di tala.
9- Yelli-s uḥerraq tefka-d ifelfel aḥerraq?
Tifrat: Tiγerdemt.
10-D iḥlalaṭen (iḥlalaḍen), d iblalaṭen (iblalaḍen), anta tamurt ur wwṭen (ur wwiḍen)?
Tifrat: Idrimen.
11-Ṭṭbeq lemṭebbeq, yekcem di temda yeγmeq?
Tifrat: Ayyur (aggur).
12-Ilef ddaw rref?
Tifrat: ayeddid.
13-Ijebbu-d ur d-ikeccem?
Tifrat: Lqermud.
14-Segmi ara yeffeγ ur d-yettaqqal?
Tifrat: Ddexxan.
15-Jeddi yeṭreḥ (yeḍreḥ), jida tceṭṭḥ?
Tifrat: Alemsir d tγerbalt.
Inzan (lemtul)
1- Ccetwa tettεedday, lεar yettegray-d deg bu tjujar (1).
2- εuhdeγ tirezzaf n meγres, alamma iga wajdim timcaṭ (timecḍin).
3-Ur tettimγur tuga, alamma icab weγyul.
4-Yemlal εli d Lekfif, fkan tiγeṭṭen i wasif.
5-Aγalim ( aγnim) d uday,yerna-yas waṭu (waḍu).
6-Ar d-yennerni, a s-nsemmi.
7-Yenna-yas yiγes i weqziḥ ( aydi) : Nekk gsayeγ ( qessiḥeq/ qqureγ). Yerra-yas-d weqziḥ: Nekk d fareγ ccγel.
8-Ma terεed deg meγres heyyi-d lehwayec i userwet, ma terεed deg yebrir heyyi-d tiserfin (tisrafin) ; ma terεed deg mayyu heyyi-d aylu.
9-Ur teddu d wid yettaǧǧan, ur zeddeγ d wid yettgaǧǧan.
10-Ay at wexxam ma ur tegganem ara, fket-aγ-d agertil.
11-Zger-iyi deg yeγẓer-ayi (-agi), zlu-yi deg wi nniṭen (nniḍen).
12- Ur ttamen llyali ma ṣḥant, ur ttamen timγarin ma ttẓallant.
13-Ur ttagad a Ǧuǧu ( tayaẓiṭ) , rrεud ad ilint.
14-Wa d awḥid, wa d lwaḥid (akken/ jmiε).
15- Ṣṣaba tettban deg yemγi-s.
16-Sibbus i tt-yexlan deg llyali.
17- lhemm ur d-nusi, d abrid ur d-yufi.
18- Ččiγ-k ay aberčečču, ilmend n čečču.
19- Aksum ifuḥen, d bab-is i t-ijemmεen.
20- Lqut i d-tnewwel ( i d-tnawel) tmeεfunt, d arraw-is i t-itetten.
21- Tiṭṭ uεejmi ar utemmu.
22- Ḥesbeγ-tent d tiwigiwin ( tiyugiwin), teffγent-iyi d ikerdan ( ikriden).
23- Afṭis (afḍis) i t-yettruẓun d gma-s.
24- Taγaṭ tazyamt, γas ur teẓẓag.
25- Amγar isewweq, tamγart tewwi-d lexber.
26- Aqemmuc afuḥan, iγil akiwan.
27- Ma yeγli wezger, ttuqquten γur-s ijenwiyen.
28- Ur yecbiḥ i ssuq, ur yelhi i leksiba.
29- Iruḥ a d-iṭerreq tagersa, yufa-ten sserwaten (2)
Tamawt:
1) Bu tjujar: D lehlak i d-itekken seg uziẓen γer yiri n lkanun.
2) Tadyan-is: Imi d-yeqqel yezleq deg nnebγa (yecceḍ deg waluc-nni n walim ) yeγli, yenna-yas: Yenεel bu win iγeṣben (iγawlen)!
* Ayen yellan ger tacciwin (…) d nekk i t-yernan.
Ǧamal B.
________________________________________________
Ilmend n wass agraγlan n tutlayt tayemmat; ilmend umulli wis-21 n tmettant n dda Lmulud At Mεemmer.
D tajmilt i Kamal Uẓerrad.
Yiwet seg temsirin i yessermed Kamal Uẓerrad, deg usideg n tiddkla Numidya.
Tiddukla Numidya n Wehran Ad tessudes “ass uselmed n teqbaylit”, ara d-yilin ass n sem (lǧemεa) 19 Furar 2O10, seg 9 n tnezzakt alamma d 18 n tmeddit.
Ahil:
9, 00 ar 9, 30.
- Awal γef waddad ideg tettidir tutlayt-nneγ s umata akk d tririt i yesteqsiyen ara d-yersen. Sγur: Ǧamal.B.
9, 30 ar 12, 00.
- D timsirin: Seg ugemmay alamma d taseftit. Sγur: Ṣaliḥa Benmeryem/Ǧamal Benεuf.
12, 00 ar 12, 30.
- Amek i d-yettili ulawi (adawi) amenzu mi ara tili kra n txeṣṣart. Sγur: Yusef Εacuri.
12, 30 ar 13, 00.
-D tanalt neγ imekli (deg usideg n tiddukla.
13, ar 14, 00.
-D asgunfu neγ asteεfu.
14, 00 ar 16, 00.
- D timsirin: Taseftit d wayen d-icudden γur-s. Sγur: Ǧamal Benεuf.
16,00 ar 16, 40.
-Iluγma akk d useγti.
16, 45 ar 17,00.
- Upirat (opérette) “Taweṭṭuft d werǧeǧǧi” ara d-turar talilt igerdan “Ameẓyan Mhenni” – aḍris d tririt s asayes: Ǧamal Benεuf.
17,00 ar 18,00.
-Taγuri usefru “Akli aweqqas” n Sεid At Mεemmer, ideg yerra tajmilt i Kamal Uẓerrad. – Taγuri usefru “Amzun d iṭij i d-yecreq” n dda Εebdella Ḥaman, ideg yerra tajmilt i dda Lmulud At Mεemmer.
- Awal γef dda Lmulud akk d Kamal Uẓerrad.
-Tikci ugerdas n yiseγ “Kamal Uẓerrad” i Ṣaliḥa Ben Meryem, imi d nettat i d tamenzut i yesslemden tamaziγt/taqbaylit, d lall n 13 iseggasen.
Anṣuf yes-wen(t) γer usideg n tiddukla n Numidya.