Akken temmug tmurt-ik ad temmugeḍ akken ; ma d adrar ad tettwimesleḍ s ṭabeε n wedrar, ma d tameddint ad taγeḍ ṭbiεa n temddint, akken diγen tiniri, tessebbeγ bab-is, tettakk-as ṭbiεa iman-is !
Nadeya teṭṭef dderbuka, Karim qarqabbu, Menad γer uggambar, Mumuḥ yessemsed taγect, d netta ar ad yecnun.
Nezzi-d agraw, yal yiwen yeṭṭef amkan-is.
Aggambar d dderbuka akken id llfen, 3 yenzizen ttawin ttarran. Dderbuka, myal tiyita tṛessa γef lmizan. Nadeya d taεeggajt, tessen !
Ar deqqal ikecm-ed qarqabbu, dderz n wuzzal d zzedwa i mi yessawal, ismendag ! ḥeḍru-d ajdab !
Mumuḥ yendeh :
Baba Mimun ! a baba Mimun !
Ddawi ḥali a baba Mimun
Taγect-is tettali tettader, tebda tḥemmu tqaεett !
Baba Mimun a baba Mimun !
Ddawi lmeḍrur a baba Mimun
Tiyitwin uggambar kkatent deg ulawen-nneγ, deg iqqeray-nneγ, ssettuyent-aγ iman-nneγ !
Taγect n Mumuḥ tettawi-yaγ anda nessarem, trefd-aγ deg igenni !
Murad yetthuzzu aqqeruy, ar deffir ar zdat.
Qarqabbu tecεel deg tmes.
Murad tkecm-it tarεaεact.
Sami yekker yegla s Lucie
Tefsi tyirsi. allaγen fessusit. ayen n dir yemsa. ulac tilisa, ulac kra wala kra !
A baba Mimun ya legnawi
Ya lmusṭafa !
Aqlaγ di leεnaya-k a baba Mimun, awi-yaγ ar tmurt n talwit, awi-yaγ ar tmurt n tafat.
Di leεnaya-k a baba Mimun !
D arrac, d tiqcicin, D aεraben, d imaziγen neγ d iṛumyen, jeddben akk !
Akken ma llan yesdukliten baba Mimun, yesfeḍ tilisa garasen !
D wagi i d aḍu id isuḍen si tniri ad as-neldi tiwwura, ad yeddu deg idurar, deg lluḍayat, win yekcem ur s iberru ḥacama yesseḥla-t !
Ğamal at Udiε