Asmekti n 20 yebrir yuγal d ansay deg tudrin. Zik, anagar deg tesdawiyin, d kra n iγerbazen nniḍen, i deg yettili kra usarag neγ n ccna neγ n umezgun.

Taddart n Iγil n Tala d yiwet seg tudrin ur yeğğin ara ansayen n tmurt ad ttwattun. Tiddukla ASSIREM γas akka i d-tlul maca seg tlalit ar tikli, ur tmured, ur tgin deg dduḥ. Ahil ines i wesmekti n Tefsutin n imaziγen, tifsutin deg mmuten yeqbayliyen akk d teqbayliyin, tifsutin deg ttwawten yeqbayliyen akk d teqbayliyin, mači d ahil aweεni. Amezgun, d taceqquft n Ğamal Benεuf, «Tamurt uεekki». D taceqquft, umi meqqer weswir, ur k-teskikkiḍ ara akken a k-tesseḍs, maca akken a k-taf abrid a k-teskuṭṭef. Ilemẓiyen n tefsut taberkant, ayen uγur ssawḍen, ur tessaweḍ ara ar γur-s kra n tsuta nniḍen uqbel deg webrid n tmmuzγa akk d tlelli. Maca wid i yettṛebbi yedles zeddigen, ad ssermimden idurar azekka. Assirem-iw ahat yezger tilas, maca yusa-d seg wul deg wayen ẓriγ ar ilemẓiyen n tmurt.

Asarag, neγ isaragen, yiwen γef umezruy, anda win i t-id-igan, Ḥafiḍ Iεezzugen, ur yeğği tiγmert deg umezruy n tmurt d wegdud-is, ur yeffiẓ ameslay, ur inuda ad yezzuzen kra n tama ; wayeḍ yewwi-t-id Arezqi Lucic γef uselmed n tmaziγt, d uguren i d-tettemlil. Dγa tzemrem a d-teslem i kra deg-s deg usaru a d-rreγ dagi deg wesmel.

Timzikkent d tin deg yezmer wemdan a d-yemmekti ayen yeḍran, ama s ttawil n isabtaren n yeγmisen, neγ s wayen i d-ugmen seg wanda nniḍen uran-t-id. Wid yemmuten deg 2001, ar tama-nsen wid yettwaṭṭfen deg 1980…

Idlisen s tmaziγt i d-fesren am iniγman, smektayen-d dakken ayen γef ddan wid yeddan, ayen γef mmuten wid yemmuten, yedder ad yidir. Taqbaylit tella ad tili. Lεimec yedda γef tudrin akken ad iqenneε imezdaγ n tmurt dakken mači s taεrabt i yessefk ad qablen aṛumi maca s tmeslayt-nsen ilan tira-s am tiyaḍ. Drus n wid yumnen imir-nni, acku deg tallit-nni Messali meqqret cciεa-s. Ass-agi idlisen i d-ifesren deg tzeqqa n uγerbaz n Iγil n Tala, ahat kra n twinas, uran s teqbaylit, ma γas ayen yettwarun γef leḥyuḍ tugar-it tefransist, yeskan-ed dakken Lεimec yezmer ad igen deg talwit, tudrin d tirni yewwḍ-itent yizen.

Ayen akk d-yeḍran deg wesmekti-yagi d azgen, tarbaεt n ccna n teqcicin d warrac n uγerbaz n yiγil n Tala d azgen. D targit i yeffγen neγ d targit kan ur neẓri ma ad teffeγ, ur neẓri ma d assedhu kan i γ-tessedhay akken a nettu tidett i γ-yeggunin. Imi sliγ i terbaεt-nni n teqcicin d warrac cennun, ttuγ dakken d Butefliqa i d aselway, ttuγ dakken d taεrabt i qqaren warrac di lakkul, ttuγ dakken Ifri ibennu lğameε deg Iγzer ameqqran ideg ad yebnu ayen a d-yawin tabaγurt i ilemẓiyen n tmurt, i wid yecban wid yeẓẓlen deg wefrag n tγiwant n Wawzellagen, ttuγ dakken mači d iqbayliyen i yettnadin a d-rren ttaṛ maca d iğaddarmiyen i yettnadin ad kksen fell-asen tacmatt-nni i sen-ḍlan ilemẓiyen n tefsut taberkant armi ḥejben deg yexxamen am yir tilawin, ttuγ dakken llan wid i ttkellixen ar ass-a s webrid n tneslemt akken a ten-awin deg webrid n taεṛabt, ttuγ, ttuγ, ttuγ...imi sliγ i tfeṛṛağ d ifeṛṛağ n Yiγil n Tala cennun,ttuγ…

Ayen swayes i i ifukk wesmekti-yagi n tefsutin imaziγen, ayen s yefra lejmaε, d ccna, d ccḍeḥ, Leḥlu Sbaε yesseḥma cwiṭ agnes, Azwaw n Yiγil, yesker aγebbar deg waluḍ, ilmeẓyen n tmurt ssnen i ccḍeḥ akken ssnen i umennuγ, ssnen i taḍsa akken ssnen i wurfan. Buxezzar Lmadani yenna-yi-d dakken nḥemmel a nezger i wasif ticki yettawi ṭṭjur akken i s-yenna yakan Lewnis, maca nekk a s-iniγ, ticki ur yettawi yara ṭṭjur wasif, γas ma nefka i yiman-nneγ akud akken a nessali imezgaren ad idumen, akken ticki ad yuγal ad yettawi isekla, a ten-id-naf imezgaren-nni, neγ tiqenṭyar nni akken a nezger deg talwit, akken a nzegger deg talwit.