Tamuγli-w

 "Brut i wawal-iw" n Nufel

Caah xas helmleγ ayen yettaru Nufel s tefransist cah yesseγres-d ar teqbaylit.

Yelli amud n yisefra s usiwel i wawal, awal lqayen umedyaz. D tamedyazt n yiḥulfan d tin n usmermeγ i yesmizzwar Nufel. Tugniwin d yuγalen atas d tid i deg amedyaz yerra-tt i weqlaqal: yettnadi tidett tayri, tilelli (asefru sb.23) deg yidelsan merra amedyaz yecca taraṭiwt n lεid (fellas daεwessu) γerneγ yenna Nufel amedyaz d win yettgallan di cckal ad -t- yerẓ, ad s-ikkes qessam-is i tugdi d “kennu” n wid yeqqaren "anεamsidicukran"  yugi aḥezzeb d uqezzeb. Dagi nesmekta-d Ali n wedfel akeswah. Akka d tasuta d rebban imenza cwi macci d tamengurt ara temmet. S ttawil, deg usefru yettreqriqen am waman, ezzifen am tmacahutt n Zhu Ddenya γnebla ma yebder-d anwa, yesdenden wid yerran aqbayli ur yeswi di tmurt-is : macci aqbayli n sserbis ah! (sb. 28) Zun akken amedyaz iga tazrawt i wayen γef tebna tmurt : wid tt-yeṭ ṭtfen cudden-as tasγart : limam, diriktur, dipiti) amar yiwen wass ad gen isem s tagi nneγ amar yiwen wass ad "ibeddel unamek" ad tbeddel fellaγ fellasen. Aya yettwura di 2008 di Tizi-Wezzu.

tagi n uzaglu yelha wawal fellas zgan icennayen isertanen, imyura, ilmeẓyen ttawin-d awal fellas maca yugi fellaγ ad ikkes! Yenna Nufel Bouzebbuǧa, D nekkni i s-igan abrid ma yella u ma ulac it ad t-id nexleq. (sb38) Ugur macci kan seg wiyaḍ i d-yekka. Ishel ad s-nini i wadi n ugemmaḍ teεmiḍ iyi.  

S usefru daγen i sen-d yesγim i yinselmen isertanen (At iccumar) d yibaɛtiyen, di tmurt n Danmark ussan agi ineggura deg yeḥma wallaγ-is, yettawel ṭṭbel-is, yeṭṭef imru inwa d asebsi : γert-tt kan tura ur d-qqareγ acemma γef wacu d-yenna deg-s!  

 Tasusmi, uffir tuffra, tuqqna, lxelwa, atan daγen aqcic yeḥbes tiẓẓifin, ibγa cwiṭ n talwit ad yessefru. Twalam amek d tura d Tasusmi waqil i d-yurwen  tuṛṛakin d wahruḥu. Tfuk tmeqqunt isefra s wawal di ɣen yemmeslay am akken yettmeslay zik Lḥesnawi deg umur n tmeṭṭtut. Acu kan macci kan d ccbaḥa kan i d-icekker neγ d leεtab n ddunit di tmeddurt-is, imi yerra-tt teqqar: “Nekk”, “Iman-iw”, Nekkini. Di yal idles, iwεer tmetti taqbaylit dγa ugar. 

Nietzsche, Heinrich Heine d waṭas n tugniwin i d-imlan amek inned Nufel yufa γer yidelsan s-d-yezzin, acu yecca seg-sen macci d nitni i t-yeccan; gedha yis. Atan tazwert n Essaid At Maamar, amedyaz amyaru, ayen yura iga adref i uskasi d usenqed n tmedyazt n Nufel, xas yekcem wemger annar, ayen yellan d lhebb ad d-iban. Tamuγli n Essaid d asemmek i tikta d tmetti igellen deg yir tamduct. Amma rrezg nneγ s wid ara yeγren akk aya. Amar wissen ahat, ad tfak ahat fella tinna n Saint Augustin d Ibn Baṭuṭa neγ Ibn Arabi, xas uklalen aqader, Aqbayli, ad yaru  ula d netta s tin yettrajun amur-is, taqbaylit, . Ma d wiyid ula d nitni zemren ad fehmen ayen nura axater d annect agi umi yettwaxdem usuqqel neγ tiririt ar tutlayin nniden.

Ibda s "wawal" ikfa s "wawal"Yehwa-ak ! Ma d nekkni s tezmert nneγ!