Temlal tasa d way’ turew di tmeγṛa d-yellan i lmend n umuli wis 50 n ccna n Dda Crif Xeddam.Ddeqs inaẓuren imeqwranen id-yemlalen, yal wa d acu s wayes id-yegla: wa s tezlitt-ines, wa s wawal zziḍen...Tajmilt tuklal ad tettwaru deg umezruy n ccna n teqbaylit.


Seg “Tirga ufennan” γeṛ “Lemri”, yezzuzn-aγ “umeqwran deg fennanen” azal n snat n tsaɛtin di tzeqqa n Zenith.
Izen neṭṭef-it, ula ma asefk-is lqay u d win iceγben yal yiwen deg-neγ, akka i triḍ ahat aγ-tessakwit mi d-tecniḍ:
“Ger sin iberdan beddeγ
Muqleγ meṛṛa tudrin
S anda rran yergazen nneγ
D acu n waḍu i ten-yebwin
D wagi i d zzheṛ nneγ
I γ-ten-yečan d timdinin”.

Mi k-nessuter aγ-d cnuḍ “Nadia a tumliḥt n tiṭ”, tenniḍ: “Nadya, dayen tura meqwṛet!”. Ihi, ma yella akken k-tga temγweṛ is-tga i Nadya, ur yelli ccek, Nadya mazal-itt d tuzyint ger teḥdayin. Imi, 75 isegwassen di lɛmeṛ-ik, 50 isegwassen n ccna, u mazal lxir ar zdat...

Ula d icennayen akw d-yusan, gan-ak tajmilt akken tt-tuklaled’. Yidir, Takfarinas, Djura, Karima, Ferḥat imaziγen imula d wiyaḍ akw nniḍen. Cebbḥen tagwnitt, yal yiwen s yiwet di tuγac-ik.
Ferḥat Imaziγen Imula werjin yecnan tayri, ass-a mači s “uqcic d uɛeṭṭar” neγ “beddeγ di tizi” iγ-yezzuzen, maca s “emmekti-d ayamdakwel d umecwaṛ nelḥa jmiɛ”. Ziγen, acḥal tecbeḥ tayri m’ar a tt-yecnu yiwen am Ferḥat!!! I keč a dda Yidir, ar melmi ihi?

Ihi, a Dda Crif, ma keč tenniḍ “d amectuḥ deg fennanen, s lɛud lexyuḍ qeṛsen-as”, ass-a, ula ma aṭan yettban γef wudem-ik, leqbayel rgagin mi slan i ṣṣut-ik.

Tanemirt-ik . Ula d nekwni ur k-nettu ara, tazeqqa teččuṛ, mebla wid ur n ssaweḍ ad-ruḥen ak-ẓren. Nessaram-ak tabγest d tezmert ar a k-yeǧen gara-neγ, akken sya γer da ad tekseḍ γef ulawen ixaqen! Am akken γ-d-tenniḍ : “ass-a lγweṛba i γef cniγ, ẓriγ d akken tecγeb-ikwen akw ula d kunwi”!

Tudert γezzifen i wfennan !

Newara.