Ussan n Wedlis amaziγ

Deg Paris ussan n 17 d 18 deg wenbeṛ 2006

Tidukkla « Tamazγa» i wumi tefka tayett tγiwant n Paris wis 14, ad tesuddes Ussan n Wedlis Amaziγ ussan n 17 d 18 deg Wenbeṛ deg Paris.

Sin wussan ittwabudden i wedlis amaziγ: d tagnitt i imezdaγ n Paris, teγzi n sin wussan, akken ad issinen ayen ittwarun s tmaziγt i d-ittwasẓergen deg Fṛansa akk d yedlisen yurzen ar imaziγen s umata (tutlayt, amezruy, taγerma, timetti, tasekla,...)

Ussan n wedlis amaziγ ad ilin diγen d tagnitt i tiririt n tejmilt i Muḥya. A d-ittwizikken usaru “Muḥend Uceεban» n Rezki Harani i d-ittwasuddmen seg tceqquft n umezgun n Muḥya. Asaru a d-ittwizikken ass n 17 deg Wenbeṛ γef temrilt 20:00(tamrilt tis 8 n tmeddit)

Ad tili diγen tmeγra ar tagara n wussan-a anda ad yecnu Azal Belkadi tizlatin tiqbayliyin tiqbuṛin, ass n 18 deg Wenbeṛ 2006 γef 8 d uzgen n tmeddit.

Ussan n Wedlis Amaziγ a d-ilin deg tzeqqa n tmeγriwin(Salle des Fêtes) n tγiwant n Paris wis 14 (12, rue Durouchoux -75014 Paris / Amitṛu : Mouton Duvernet)

Akud :
   17 deg wenbeṛ : 14h00 - 22h00
   18 deg wenbeṛ : 10h00 - 22h00.