Amagrad-agi, d tajmilt I wedlis yellan deg yiwet tallit n umezruy d asalel ageldan n weḥraz n tedmi d-yurew wallaγ n wemdan. Seg wasmi d-yesnulfa wemdan isekkilen akken ad yaru tutlayt-is, yesseqdec mačči yiwen usalel akken ad yeğğ lḥafer n tillin-is. S wejmaε n tektiwin d weḥraz-nsent, tissi tettak-itent I tayeḍ, I ssawḍen iγerfan n wemḍal ad bdun tiγermiwin-nsen.

Ma neεreḍ ad nefk tabadut n wedlis, s tewzel, nezmer a d-nini: d taffa n isebtar n lkaγeḍ rqiqen yuran jemεen s uxiḍi neγ asenteḍ s llesqa, ssyin akin, a ten-γumen s lkaγeḍ zuren. S imeslayen nniḍen, adlis d allus s tugta n tira n weḍris akken ad taweḍ tussna d tmussni γur yal amdan anda yebγa yili, tallit yebγa yedder-itt. Adlis daγen mačči d aḥraz kan n yeḍrisen, d taγawsa tafessast nezmer a tt-nawi deg ufus-nneγ, s anda nebγa ad nruḥ yis-s akken a tt-nγer . idlisen ma ggten, nḥerrez-iten di temkarḍit n wexxam neγ tin yebnan I yemdanen s umata meqqret γef tmezwarut .

Zdat ad yesnulfu wemdan isekkilen akken ad yaru tutlayt-is, yessuneγ tiktiwin-is γef weẓru, amedya n yeslaḍen n Tasili deg uneẓruf n Tefriqt ugafa umi neqqar Tiniri. Akka I d-yebda umezruy n isalalen n tira akken ad yessenfali wemdan tiktiwin-is wa a ten-yeḥrez. Seg weslaḍ n weẓru γer win n ideqqi, akal-nni isi nettmahal afexxar, iγerfan, yal yiwen amek d-yesnulfa asalel I tira-s.Si tallit γer tayeḍ asalel yemhez d tγermiwin ; mačči d yiwen I yeqdec wemdan I tira, islaḍen n weẓru d wid udeqqi, tancirt, lkettan…

Iferεunen sqedcen papyrus, d yiwen yemγi teddzen.ssyin akin, iγerfan nniḍen snulfan-d adlis amezwaru yesεan isebtar n weglim n iγersiwen umi fkan isem n parchemin. Ayen yura s tegrigit ugellid amaziγ Yuba II yewweḍ-aγ-d deg yedlisen n weglim n iγersiwen…maca tagrawla n wedlis teḍra-d d wesnulfu n lkaγeḍ di tazwara di tmurt n Ccin, ssyin akkin d tamacint n Mass Gutenberg di Lalman.d isekkilen yettembiwilen I d-yurwen adlis atrar I nesεa tura.

Adlis amaziγ s tutlayin tiberraniyin yetbεa amhaz d-yeḍran deg wemḍal. Ma d win yuran srid s tmaziγt tatrart ilul-d deg iseggasen 1980.Ungal Askuti, Faffa, Iḍ d wass d wiyaḍ ldin abrid I tutlayt d weγref amaziγ I lebni n tγerma-s.

I tikelt tamezwarut ahat deg umezruy I yessaweḍ umaziγ yefhem d akken tilin-is d amdan, d aγref, d tamurt icudd γer tilin d gemmu n tutlayt-is?

Asalu tura yerreẓ …

Smaεil ΣEBDENBI