Assa i yemmut Jean. Neγ ma iḍelli. Ur zṛiγ ara. D yemma-s, Geneviève, i yi-d-yennan.

Nemyussan asseggas n 1989. Yusa-d netta d yiwet n terbaεt akken n Iṛupyen. usan-d ad ḥewwsen ad issinen Jeṛjer. Win ad sen-iwellhen iberdan d Mmi-s εemmi, Waεli. Ad sen-yessken tamurt. Waεli yesrezf-d Jean ar wexxam-nneγ. Ssmana i yeqqim γurn-eγ. Netta lexlaṣ-is yeḍmen. Yeṭṭf-iten d imeqqranen !

Cfiγ, jean yewwḍ-d kan yemmezgg-d netta d yaya akken ilaq.

Baba iḥar, ur s-yeεjjib ara lḥal ! ‘‘D lmuḥal ad izeṛ yemma-s yella wi s-yesferfden !’’

Dacu nekki makken zriγ bli netta yesferfud-as i yemma, yarnu iḥeṛṛma-s likaci n tarrawt. ṛγiγ ad zṛeγ Jean yuli yaya. Qqareγ-as awah a ṛebbi ad tt-yali ! Ah lemmer ad tekkes jjiq yaya ! ad tt-teqqed uqbel ad tt-neẓẓu deg wakal.

Γas akken 16 iseggasen di lεemṛ-iw, fehmeγ kra n tlufa. Baba deg wassen dγa i zṛiγ neck yid-s ulac amsefhem. Yal yiwen d abrid-is.

Ass wis-sin γef id yussa Jean, uγaleγ mmezgeγ-d ula d nekk yid-s dayen kan. Baba mi yezṛa akken, dγa yennerna uγilif-is ‘‘amek akkagi ! si yemma… tura atan iεedda γer mmi Lvachir’’

Ussan-nni dγa aṭas n ijernanen di Fṛansa, awal-nsen yezgga γef taluft-agi n wuqqu n warrac imecṭuḥen. Γer Baba, iṛumyen akken ma llan kkaten arrac, ḥemmlen telqeq !

D win i tt-ixeddmen i yettcukkun. Baba am netta am tizzya-s meṛṛa, yewwi-d yemma di dduḥ. wwten tileqqaqin almi dayen belγent, wwḍent d tilawin !

Nekk zṛiγ, m’aṭas akk, yaya ad s-t-id-ṭṭeḍ i Jean, daya m’ara t-izmir meskint.

Udm-is yekmec amzun d tafeγwett. Ifassen-is seg wakken i ten-yečča wakal, uγalen am iqerdacen. lemmer ad tesslutef yiwen ad s-tccerreg akk aglim-is. am win ar ad yeṭṭṣen d tuccent !

Ma’ara teqqummec ad teẓẓiẓen iṭij, teskmumus iman-is i wakken tibbuccin-is ur ttawḍent ara γer lqaεa. Uγalent d tiblablaḍin. Aṭas I εlulqen γur-sent baba d watma-s. Rran-tent d ‘‘tirbulet’’!

Γef akken d-ḥekkun: yaya, asmi meẓẓiyet d abannag !

Ma d assa aqlaγ di 1989, sin leqṛun γef tegrawla Fṛansis. Ccbaḥa n yaya teffer am akken teffer lefhama γer Leqbayel. ala ayen i nsell γer medden

Ma d tuṭṭḍa kan, ad yili wamek ! Ad tekkes kan tuγmas-is, ad yilwiγ yimi-s. Imiren alih ad terfed asebsi γef iman-is. Ad tespufeḥ !

yarnu tuṭṭḍa ulac fell-as. D Imarikanen i yeqqaren ṭṭeḍ f yiman-ik ur tesεiḍ i yellan. Tuṭṭḍa ḥlalet !

Ad d-nuγal γer Jean.

Mi yessaweḍ 5 wussan, alih yejjay-aγ, yuγal.

Cfiγ m’akken yekkat ad yemmeslay s teqbaylit d yaya, tettmettat deg teḍṣa. ur yessin ara, yesseεwaj. M’ara yeγli γef wučči…qeṛṛeε ur t-id-yettqerriε ara. D anu, ssureg γef yiman-ik !

 Ciγ γef udem-is, allen-is, aseḍsu-s.

Seg wassen yekka tawwurt, ur nuγal ad t-nzeṛ !

deg ubdil n turizm snulfan-aγ-d tirurizm, nseεedda 10 iseggasen lεali n rrebrab.

 Jean mačči iεefs-d akal n Lzzayer ulama tikkelt. Dyen kan yaεni…

Dg 10 iseggasen-agi, nemcceggaε akken kra n tikkwal tibratin. Iceggε-iyi-d ungalen, tiktabin. Iceggεiyi-d ula d tagiṭart, γaya-tt ! yes-s i xedmeγ taγect-nni n limam !

yemma-s mi s-ssawleγ di tilifun, tenna-yi dakken Jean tewt-it tjenniwt n’’Altermondialisme’’, d tajenniwt yekkaten at tmura yagi ufella. Teγzi n wussan-a ad itett pizza ad yeṭṭalay isura, wid akken i d-yeskanen llaẓ di Tfarka. 7 iseggasen netta akken !

‘‘Ma ssextaṛen-iyi ger lḥeq d yemma, ad xtiṛeγ pizza’’ akka i yenna yiwet n tikkelt !

Sbeḥ-nni dγa n 1ru n yebrir 2009, mi tedla yemma-s fell-as, tufa-t yeqqur. yuγal d azzeqquṛ. aqqeruy-is yebra. taqemjett-is amzun akken tennuγ d pizza. Geneviève tezṛa dayen, yemmut mmi-s. Dayen yeffγ-it ṛṛuḥ !

Tsembawel taγerdayt n uselkim, tufrar-d tsewwaṛt taneggarut n usaru-nni ‘‘ Yir targit n Darwin’’.

D winna i yella yettwali !

ṭbib mi s-yedla, yufa dakken d ulis i iḥebsen. Treggl-as ul-is tassemt !

Ssawleγ ar wexxam-is, acku iṛeggem-iyi a yi-d-iceggeε lkkaγeḍ n tnezduγt, iwakken ad ssutreγ lbiza, taggara ziγen yemmut !

Wwteγ akk akken ur yi-d-yettaf ara 9 yebrir 2009 di tmurt n Lezzayer. nniγ-as ad rewleγ, ur d-ttuγaleγ ara γef 5 iseggasen axxi…

Jean yemmut. Ma d nekk tnakkeγ, akka ad yi-tiggar Butefliqa alma yemmut .

Tuṭṭfa deg-wen a yat leεṛaḍ !

Lbacir buclaγem n wecεir. Tudert n wecεir !

 

G.T : 

aḍris-agi d tajmilt i Jean akk d yaya. I sin atnan tura ger ifassen n ugellid ameqqran…atg

dacu ar tura akka ur tefra ara :

w’ara d-yinin ma teṭṭḍ-as-t-id yaya i Jean neγ ala ? ur nezṛ’ara !